Minisiteri y’Ubuhinzi n’Ubworozi, MINAGRI, yahembye Abanyamakuru bahize abandi mu gukora inkuru nziza zijyanye n’ubuhinzi kuri Radiyo, Televiziyo na Murandasi.
Iki gikorwa cyabaye kuri uyu wa Kane tariki ya 7 Ukwakira 2024, kikaba gitegurwa n’ihuriro ry’abanyamakuru mu Rwanda, ARJ ku bufatanye n’urwego rw’Igihugu rw’Imiyoborere; RGB hagamijwe guhemba abanyamakuru bahiga abandi mu gukora inkuru nziza mu byiciro bitandukanye.
Aba banyamakuru bahembwe mudasobwa nziza, ndetse n’ibikombe by’ishimwe.
Umunyamakuru wahembwe wahize abandi mu kwandika inkuru nziza ijyanye n’ubuhinzi inyura kuri Radiyo ni Jeannine Ndayizeye ukorera RBA, wafatiwe igihembo n’Umuyobozi wungirije wa Radiyo za RBA, Ines Ghislaine Nyinawumuntu.
Naho umunyamakuru wahembwe wanditse inkuru nziza y’ubuhinzi yanyujijwe kuri televiziyo ni Cyubahiro Bonaventure nawe usanzwe akorera RBA.
Mu gihe Emma Marie Umurerwa ukorera Iriba News yabaye umunyamakuru mwiza wanditse inkuru y’ubuhinzi yo kuri murandasi.
Aba banyamakuru bagejejweho ibihembo n’Umuyobozi ushinzwe itangazamakuru n’itumanaho muri Minisiteri y’Ubuhinzi n’Ubworozi, Kwibuka Eugene.
