Kuri uyu wa gatanu, tariki ya 15 Ugushyingo 2024, Minisiteri y’Uburezi yatangaje amanota y’ibizamini bya Leta bisoza amashuri yisumbuye y’umwaka w’amashuri wa 2023/2024.
Iki gikorwa cyagendanye no guhemba abanyeshuri bari mu byiciro 18 batsinze neza kurusha abandi ku rwego rw’Igihugu.
Minisiteri y’Uburezi yashyizeho uburyo bushya bwo kubara amanota, aho uwatsinze mu masomo yose ari uwagize hejuru ya 50%, bitandukanye n’ubwari busanzweho aho uwemererwaga kujya muri kaminuza ari uwabaga yatsinze amasomo abiri y’ingenzi.
MINEDUC ivuga ko abagize munsi ya 50% bazajya bafashwa mu kuba basibira cyangwa bagakora ibizamini byo gusubiramo mu buryo buzwi nka ‘Candidat Libre’.
Umunyamabanga wa Leta muri Minisiteri y’Uburezi, Irere Claudette yagize ati“ Hariho abazifuza gusubira mu mashuri, rwose ntawe uzababuza gusubirayo ariko utashaka gusubirayo twanakoze isuzuma kuri ibi bigo bikoresha ‘Candidat Libre’, hari ibyo tumaze gusuzuma tuzi neza ko bizabafasha.“
Minisitiri Nsengimana yavuze urwego rw’uburezi ndetse na Guverinoma muri rusange, bafite intego y’uko abana bahabwa ubumenyi bwiza buzabafasha gushyira mu bikorwa ibyo u Rwanda rwiyemeje kugeraho.
Ati “Ari mu kwigisha ari no mu kubaza no mu gutsinda tujya imbere, turasaba abantu ko babishyiramo imbaraga kuko uburezi ni bwo tuzashingiraho kugira ngo tugere ku cyerekezo 2050.”
Muri rusanjye Abanyeshuri batsinze ibizamini bya Leta ni 71.746 bangana na 78.6%, mu gihe hari hakoze abanyeshuri 91.298 muri 91.713 bari biyandikije.
Mu mashuri y’ubumenyi rusange hakoze abanyeshuri 56.300 hatsinda 38016 bangana na 67%. Abo mu mashuri y’imyuga n’ubumenyingiro TSS hakoze 30.730, abatsinze ni 29.542, mu gihe aba Professional Education hiyandikishije 4271, hakora 4268 ariko abatsinze ni 4188, bingana na 98,1%.
