Minisitiri w’Ubuzima Dr. Sabin Nsanzimana yagejeje ku Nteko Rusange y’Abadepite, umushinga w’Itegeko rishya rigena serivisi z’ubuvuzi, harimo kwemerera ingimbi n’abangavu kwifatira ibyemezo bijyanye n’ubuzima bw’imyororokere no gufasha imiryango itabasha kubona urubyaro, kubyara hakoreshejwe ikoranabuhanga.
Ni igikorwa cyabaye ku wa gatatu, tariki ya 5 Ugushyingo 2024, aho Minisiteri y’Ubuzima yatangaje ko iri tegeko risimbuye itegeko N° 10/98 ryo ku wa 28/10/1998, ryerekeye umwuga wo kuvura ariko ritakijyanye n’igihe kubera iterambere ryihuse riri mu buvuzi.
Ibigendanye n’iri tegeko rishya harimo kuvugurura imyaka yo kwemererwa ingimbi n’abangavu kubona serivisi zijyanye n’ubuzima bw’imyororokere, kubera ko buri muntu wese afite uburenganzira bwo kugerwaho n’ibikorwa by’ubuvuzi hatabayeho ivangura iryariryo ryose, bisobanura ko umuntu wese uri hejuru y’imyaka 18 ashobora kwifatira icyemezo kubirebana n’ubuzima bwe bw’imyororokere.
Indi ngingo irebana no kubyara cyangwa se ibyo twakita kororoka, yashyizweho hagendeye ku kuba hari ubwiyongere bwinshi bw’abantu bakenera service zo kororoka hakoreshejwe ikoranabuhanga rifasha abashakanye badashobora gusama bisanzwe kandi izo serivisi zikaba zaratangiye gutangwa mu Rwanda.
Mu rwego rwo kugirango izi serivisi zibashe kugenzurwa hashyizweho ingingo yerekeye kororoka cyangwa se kubyara hakoreshejwe ikoranabuhanga.
Minisiteri y’Ubuzima ivuga ko aya mategeko mashya azagabanya ihazabu yacibwaga kubera amakosa yakozwe n’abaganga, amafaranga yakoreshwaga mu nkiko n’igihe cyatakaraga mu manza.
Ryitezweho ko rizagira ingaruka nziza ku bukungu kuberako rizagabanya amafaranga Abanyarwanda batangaga mu bihugu byo hanze bajya gushaka serivisi zo kororoka hakoreshejwe ikoranabuhanga, ndetse ishyirwa mu bikorwa ryaryo rizafasha mu gukurura abashoramari mu by’ubuzima bashobora gushinga ibigo by’ikoranabuhanga bifasha mu kororoka.
