Minisiteri ya Siporo yatangaje ko abazitabira umukino uzahuza u Rwanda na Libya bazaparika imodoka muri BK Arena bitewe n’itike yaguzwe, abandi baparike ahahoze hakorera Metropolitan Police.
Kuri uyu wa Kane, tariki ya 14 Ugushingo 2024 Saa Kumi n’Ebyiri z’umugoroba muri Stade Amahoro hazabera umukino uzahuza ikipe y’u Rwanda (Amavubi) na Libya mu gushaka itike y’Igikombe cya Afurika cya 2025.
Mu mikino yabanje abenshi bagiye binubira ko bagorwa no kubona aho basiga ibinyabiziga byabo kubera ko muri Stade Amahoro hatemerwe kuhaparika.
Mazimpaka JeanPierre ukoresha urubuga rwa X yasangije ubutumwa abaza niba guparika muri Stade Amahoro bizaba byemewe n’ikiguzi bisaba.
Mu butumwa bwe yagize ati” Ese guparika muri parikingi ya Stade Amahoro noneho biremewe? Uwemerewe ni uwaguze tike y’angahe?”
Minisiteri ya Siporo yasubije ubu butumwa, iti” Ticket ya VVIP, Business Suites na Skyboxes bazaparika kuri BK Arena, bazaba banyuze kuri Controle Technique, naho abafite ticket ya VIP(10K) ni muri Parking iri ahahoze hakorera Metropolitan Police, bazaba banyuze hagati yo kwa Rwahama na MTN.“
Ubundi kwinjira muri Stade Amahoro kureba uyu mukino, ahasanzwe haba hasi cyangwa se hejuru ni 2000 Frw, VIP ni ibihumbi 10 Frw naho Business Suite iri ahazwi nka ‘Executive Seat’ ni ibihumbi 50 Frw mu gihe ‘Sky Box’ yishyurwa 1 000 000 Frw.
Amavubi azaba ahura na Libya mu mukino w’umunsi wa kane wo gusha itike y’igikombe cy’Afurika 2025. Kugeza ubu Nigeria iyoboye iri tsinda n’amanota 10, ikurikirwa na Bénin ifite amanota 6, u Rwanda ruza ku mwanya wa gatatu n’amanota 5, mu gihe Libya iri ku mwanya wa kane n’inota rimwe.
