Minisitiri w’Ububanyi n’Amahanga n’Ubutwererane, Amb Olivier Nduhungirehe, yahuye n’Umuyobozi Mukuru w’Umuryango Mpuzamahanga wita ku by’inkingo (Gavi), Dr Sania Nishtar.
Aba bombi bari bitabiriye Inama Mpuzamahanga y’Ubukungu (World Economic Forum) yaberaraga i Davos mu Busuwisi, kuva tariki 19-23 Mutarama 2026.
Ibiganiro byabo byibanze ku bufatanye bw’u Rwanda na Gavi ndetse n’uruhare rw’u Rwanda mu gushakira inkunga ibikorwa by’ubuzima no gukora inkingo ku rwego rw’Akarere.
U Rwanda rurateganya gutangira gukora inkingo mu Rwanda .
Mu Ukwakira umwaka ushize, Perezida wa Repubulika Paul Kagame, yagiranye ibiganiro na Perezida wa Komisiyo y’Umuryango w’Ubumwe bw’u Burayi, Ursula Von der Leyern ku mikoranire no gukomeza ubufasha mu bijyanye no gukora inkingo mu Rwanda.
Ibi biganiro byakurikiwe n’itangwa ry’inkunga ya miliyoni 95 z’Amayero (Miliyari zisaga 160Frw) yo gufasha uruganda rw’inkingo rwa BioNTech mRNA rukora inkingo mu Rwanda.
Ni inkunga yatanzwe hagamijwe gushyigikira gahunda yo gukorera inkingo muri Afurika, ikaba ikubiyemo miliyoni 40 z’amayero (hafi miliyari 70Frw) yagenewe u Rwanda mu gushyigikira urugendo rwo gukora inkingo n’ibindi bikoresho by’ubuvuzi.
Dr. Sania Nishtar yagizwe Umuyobozi Mukuru (CEO) wa Gavi, the Vaccine Alliance ku wa 18 Werurwe 2024, asimbuye Dr. Seth Berkley, akaba afite inshingano zo kuyobora Gavi mu gihe cy’imyaka itanu itaha (2026-2030).
Uyu yabaye Umusenateri muri Pakistan, akaba ari impuguke mu bijyanye n’ubuzima bw’abaturage n’iterambere, afite ubunararibonye bw’imyaka irenga 30.
