Minisitiri w’Ingabo, Juvenal Marizamunda, yashimye ubufatanye ibihugu bihuriye mu Mutwe w’Ingabo zihora ziteguye gutabara aho rukomeye muri Afurika y’Iburasirazuba (EASF), byagaragaje mu guteza imbere umutekano, asaba ko hashyirwamo imbaraga mu gusigasira amahoro aho yamaze kugera.
Ni ibyo yagarutseho ku wa Kane, tariki ya 19 Ukuboza 2024, mu Nama ya 33 y’isuzuma ry’imikorere, yahuriwemo n’Abagaba bakuru b’Ingabo zihora ziteguye gutabara zo muri EAC (EASF), iri kubera i Kigali.
Minisitiri Marizamunda yashimye ubufatanye bugaragara hagati y’ibihugu bigize EASF hagamijwe kurinda no kwimakaza amahoro n’umutekano.
Ati” Dukwiriye gukomeza gukorera hamwe mu nzego za politiki, umutekano, iterambere, n’ibikorwa by’ubutabazi, twimakaza ubufatanye hagati y’ibihugu bigize uyu muryango, mu nzego z’ubukungu nkuko tubisabwa tukanabifashwamo n’umuryango wa Afurika Yunze Ubumwe, kugira ngo dutange umusanzu wacu ku mahoro n’umutekano”
Yakomeje agaragaza ko EASF yatanze umusanzu ukomeye mu kugarura amahoro n’umutekano, ndetse asaba ko aho byagezweho mu Karere, bigomba gukomeza gusigasirwa.
Ati” Dukeneye gusigasira amahoro aho yamaze kugerwaho, umurimo ukomeye udasaba kuvugwa cyane. Guhagarika intambara n’ibibangamiye ubuzima bwa muntu ni intego duhuriyeho. Ni yo mpamvu mbasaba gukoresha imbaraga zashyizweho mu guharanira amahoro n’umutekano mu karere no muri Afurika.”
Umugaba Mukuru w’Ingabo z’u Rwanda, akaba n’Umuyobozi Mukuru wa Komite y’abagaba bakuru b’ingabo muri EASF, General Mubarakh Muganga, yagaragaje ko mu myaka bamaze bakora, hakozwe byinshi mu kubungabunga amahoro, ndetse avuga ko biteguye gutanga uburyo bukenewe ngo hongerwe ubushobozi bw’ingabo ku buryo zihora ziteguye gutabara.
EASF yatangiye mu 2014, igizwe n’u Rwanda, u Burundi, Ibirwa bya Comores, Djibouti, Ethiopia, Kenya, Seychelles, Somalia, Sudani na Uganda. Muri iyi nama bizihizaga imyaka 20 ishize uru rwego rubayeho, ndetse barebera hamwe ibyagezweho.
