Minisitiri w’Ububanyi n’Amahanga w’u Rwanda, Amb Olivier Nduhungirehe na mugenzi we wa Israel, Gideon Sa’ar, bagiranye ikiganiro cyagarutse ku mubano w’ibihugu byombi ndetse n’ishusho y’umutekano uri mu Karere.
Aba bayobozi baganiriye kuri telefoni, kuri uyu wa Kane, tariki ya 30 Mutarama 2025, nk’uko byatangajwe binyuze ku rubuga rwa X rwa Gideon Sa’ar n’urwa Minisiteri y’Ububanyi n’Amahanga.
Minisitiri w’Ububanyi n’Amahanga wa Israel, Gideon Sa’ar, yatangaje ko yagiranye ibiganiro na Nduhungirehe, avuga ko baganiriye ku mubano w’ibihugu byombi ndetse anamusangiza ku byerekeye ibibazo biri mu Burasirazuba bwo Hagati.
Yagize ati “Namubwiye ku bufasha bwacu mu biganiro bigamije kuzana amahoro mu Karere k’Ibiyaga Bigari.’’
Minisiteri y’Ububanyi n’Amahanga y’u Rwanda na yo yahise itangaza ko Amb. Nduhungirehe yasobanuriye Minisitiri Gideon, intandaro y’ibibazo bikomeje koreka Akarere k’Ibiyaga Bigari, by’umwihariko kuba hari Umutwe w’abasize bakoze Jenoside mu Rwanda, FDLR n’inzira yerekanywe yageza ku kugarura amahoro.
