Ku gicamunsi cyo kuri uyu wa kabiri, Minisitiri w’Intebe, Dr. Edouard Ngirente yakiriye indahiro za Perezida w’Urukiko Rukuru rwa Gisirikare, Brig Gen Patrick Karuretwa na Visi Perezida Lt Col Sumanyi Charles, n’abandi bagizwe abacamanza muri uru rukiko.
Uyu muhango wabaye kuri uyu wa kabiri, tariki ya 10 Ukuboza 2024. Abandi barahiye ni Lt Col Gerard Muhigirwa wagizwe Visi Perezida w’Urukiko rwa Gisirikare.
Lt Ndayishimiye Darcy na Lt Mukasakindi Thérèse barahiriye kuba Abacamanza mu Rukiko Rukuru rwa Gisirikare, naho Capt. Moses Ndoba na Lt. Victor Kamanda barahiriye kuba Abacamanza mu Rukiko rwa Gisirikare.
Minisitiri w’Intebe, Dr. Edouard Ngirente yabasabye guhora bazirikana icyizere bagiriwe n’ubuyobozi bukuru bw’Igihugu ndetse n’Ubuyobozi bw’Ingabo z’u Rwanda (RDF).
Ati “Imiterere y’umurimo mukora ujyanye no kubahiriza amategeko n’uburenganzira bwa muntu, irabasaba ubushishozi, ubwitonzi, ubwitange ndetse no kuwukora kinyamwuga.”
Nyuma yo kurahirira izi nshingano, Brig. Gen. Patrick Karuretwa yavuze ko ikinyabupfura ari ikintu Ingabo z’u Rwanda ziha agaciro, kugira ngo hatagira ukoresha nabi ububasha ahabwa n’amategeko.
Brig Gen Karuretwa Patrick wagizwe Perezida w’Urukiko Rukuru rwa Gisirikare yari asanzwe ari Umuyobozi Mukuru ushinzwe imikoranire mpuzamahanga mu Ngabo z’u Rwanda.
Yize amategeko muri Kaminuza y’u Rwanda mu 2000, akomereza muri Kaminuza yo muri Leta Zunze Ubumwe za Amerika aho yakuye Dipolome y’icyiciro cya Gatatu cya Kaminuza mu mategeko mpuzamahanga.
Lt Col Sumanyi Charles wagizwe Visi Perezida w’Urukiko Rukuru rwa Gisirikare yari asanzwe ari umucamanza muri uru rukiko.
