Minisitiri w’Ubuzima, Dr Sabin Nsanzimana yagaragaje ko indwara zibasira urwungano ngogozi ( kuva mu kanwa ugeraho aho imyanda y’ibiryo n’ibyo kunywa isohokera) zigenda ziyongera, akaba ariyo mpamvu u Rwanda na Afurika byashyize imbaraga mu kuzivura mu buryo bugezweho.
Ni ibyo yagarutseho ku wa mbere, tariki ya 16 Ukuboza, mu gihe mu Rwanda hari kubera inama yahuje abaganga baturutse mu bihugu birenga 20 by’Afurika bivuga ururimi rw’Igifaransa, aho bari kuganira ku bushakashatsi bwo kuvura izi indwara, ndetse no kuzikumira.
Minisitiri Nsanzimana yasobanuye ko idwara zifata urwungano ngongozi zigira uruhare mu gutera kanseri bimwe mu bice byarwo, akenshi bituruka mu kunywa inzoga, isukari n’umuntu mwinshi n’ibindi bigira ingaruka ku mubiri w’umuntu, bikawuviramo indwara.
Yagize ati” Inzira ( y’urwungano ngogozi) icamo ibintu byinshi bihindura uturemangingo tuba turi muri iyo nzira hakaziramo indwara. Aba bahanga bateraniye mu Rwanda n’ikigo RICARD cyashyizweho mu kubaga kanseri zifata urwungano ngogozi.”
Yakomeje agaragaza ko aba bahanga bafite ikoranabuhanga rishobora kugaragaza ko umuntu azarwara indwara runaka mu gihe kiri imbere, zirimo nka kanseri y’amara, abaganga bashobora gusuzuma bakabona ko umuntu azayirwara mu myaka itanu iri imbere.
Ati” Icyo cyuma kizwi nka Endoscopie, ishobora gukorwa ikabona utubyimba dutangiye kuza m’urura, hanyuma tukavanwaho ukaba uyitindijeho indi myaka itanu. Ku bantu barengeje imyaka 40 na 50, icyo kizamini kiba kigomba gukorwa buri gihe, aho ni ukubibona hanyuma ukabitinza, cyangwa se ukayikuraho igihe ibonetse hakiri kare.”
Minisitiri Nsanzimana yagaragaje ko mu myaka 30 ishize u Rwanda ruhagaritse Jenoside yakorewe Abatutsi mu 1994, byibura buri myaka 10 hagomba kuba hari ikintu cy’ingenzi cyakozwe mu gihugu, aho kuri ubu hari gushyirwa imbaraga mu buvuzi bukoreshejwe ikoranabuhanga, kugirango hagaruzwe igihe cyatakaye.
Yagaragaje ko kugeza ubu indwara ziza imbere mu gutera impfu z’Abanyarwanda ari kanseri, indwara z’umutima ndetse na Diyabeti, akaba ariyo mpamvu hashyirwamo imbaraga mu kwagura ubuvuzi.
