Minisitiri wa Siporo, Nyirishema Richard yavuze ko ari ishema ku Rwanda kuba rugiye kwakira Inteko Rusange y’Ishyirahamwe ry’Umukino wo Gusiganwa mu Modoka ku Isi, FIA, ndetse agaragaza ko izagira uruhare mu gukundisha abakobwa gutwara imodoka.
Ni ibyo yagarutseho ubwo yari mu kiganiro na RBA, ku mugoroba wo ku wa Kane tariki ya 5 Ukuboza, ubwo yasobanuraga aho imyiteguro yo kwakira iyi Nteko Rusanjye igeze, mu gihe habura iminsi ibarirwa ku ntoki.
Inteko Rusanjye ya FIA itegerejwe i Kigali mu Rwanda, guhera tariki ya 9-13 Ukuboza 2024, ikaba ari inshuro ya mbere igiye kubera muri Afurika, mu myaka 120.
Minisitiri Nyirishema yavuze ko kwakira iyi Nteko ari ishema ku Rwanda rusanzwe ruzwiho gutegura neza inama n’ibikorwa bya siporo mpuzamahanga.
Ati” U Rwanda ruzwi ko rutegura neza inama n’ibikorwa bya siporo. Bigaragaza ubushobozi bwarwo mu gutegura ibikorwa mpuzamahanga.”
Minisitiri Nyirishema yagaragaje ko kwakira iyi Nteko ari igikorwa gifitiye inyungu igihugu n’Abanyarwanda muri rusanjye, ati” Ni abantu baza bakeneye gufatwa neza no gusura u Rwanda. Mu buryo bumwe cyangwa ubundi, Umunyarwanda azagira aho ahurira na bo.”
Yakomeje agaragaza ko iki gikorwa kizagira uruhare mu rugendo rw’igihugu rwo gukundisha abarimo abakobwa umukino wo gutwara imodoka bakiri bato.
Ku munsi wa mbere w’iyi nama hateganyijwe gahunda ya “Girls on Track” aho abana b’abakobwa bo mu mashuri bazatwara imodoka za ‘Karting’ na E-sport.
Inteko Rusanjye ya FIA izitabirwa n’abasanga 850, ndetse isozwe hahembwa abakinnyi bo gusiganwa ku modoka bitwaye neza.
