Minisitiri w’Intebe, Dr. Edouard Ngirente, yashimangiye ko u Rwanda ruri gutera intambwe ishimishije mu burezi bushingiye ku bumenyingiro, ashimira abarangije amasomo muri Rwanda Polytechnic, kuba barafashe icyemezo cyo kwiga imyuga na tekiniki, bagamije guteza imbere igihugu binyuze mu bumenyi bufatika.
Ibi yabigarutseho kuri uyu wa Kane, tariki ya 29 Gicurasi 2025, ubwo yitabiraga ibirori byo gutanga impamyabushobozi ku nshuro ya munani mw’Ishuri Rikuru ry’Imyuga n’Ubumenyingiro ry’u Rwanda, RP (Rwanda Polytechnic), byabereye muri BK Arena, aho abanyeshuri 4,562 barangije mu mashami atandukanye mu cyiciro cya mbere n’icya kabiri cya Kaminuza.
Minisitiri Dr.Ngirente yavuze ko iri shuri rikomeje kuba igisubizo ku isoko ry’umurimo, ashingiye ku bushakashatsi bwakozwe na RP, bwagaragaje ko 70% by’abarangije mu 2024 bafite icyo bakora: 59% babonye akazi, 11% bakomeje amasomo cyangwa bari kwimenyereza umwuga, naho 18% bihangiye imirimo.
Ati “Iyi ni intambwe nziza Rwanda Polytechnic iteye mu gushakira Igihugu abakozi bafite ubumenyingiro bukenewe ku isoko ry’umurimo. Biragaragara ko ubumenyi butangwa na RP bufite ireme kuko abakoresha banyuzwe n’ubushobozi bw’abarangije.”
Yakomeje ashimira ababyeyi n’Abanyarwanda muri rusange kuba bamaze guhindura imyumvire ku bijyanye n’amasomo ya tekiniki n’imyuga, ati “Guverinoma irishimira ko ababyeyi benshi bamaze gusobanukirwa n’akamaro k’aya masomo, bakaba baramaze kuyibonamo icyizere cy’ejo hazaza.”
Dr. Ngirente kandi yagarutse kuri gahunda ya Leta yo guteza imbere ubumenyi buzashingirwaho mu rugendo rugana ku Rwanda rufite ubukungu bushingiye ku bumenyi, mu rwego rwo kugera ku cyerekezo 2050, ati “Kimwe mu by’ingenzi NST2 yashyize imbere ni uguteza imbere imyuga na tekiniki. RP ifite uruhare runini mu kudufasha kugera kuri izo ntego.”
Abahawe impamyabushobozi bize amasomo atandukanye arimo Ubwubatsi, Amashanyarazi, Ubumenyi mu bijyanye n’Ibinyabuzima (Veterinary Technology), Ikoranabuhanga mu Itumanaho n’Isakazabumenyi, Ubukanishi, Gutunganya Amashyamba, Ubucukuzi bw’Amabuye y’Agaciro, Amahoteri, Ubuhinzi n’Ubworozi, n’ibindi.
Mu ijambo ry’ikaze, Umuyobozi wa Rwanda Polytechnic, Dr. Sylvie Mucyo, yasabye abarangije gukoresha ubumenyi bavomye muri RP mu gukemura ibibazo byugarije sosiyete no kugira uruhare mu iterambere ry’igihugu.
Ati “Mufite ubushobozi bwo guhanga udushya, guhindura ubuzima bw’ababakomokaho no gufasha Igihugu kwihuta mu rugendo rwo kwigira.”
Muri uyu muhango, hanatanzwe ibihembo ku banyeshuri bitwaye neza mu marushanwa ya “RP Skills Challenge 2025”, aho batanzweho ibyiciro birimo zahabu (Gold), feza (Silver), umuringa (Bronze), n’umunyeshuri witwaye neza mu masomo ya Engineering.
RP ifite amashami umunani mu Rwanda ariyo IPRC Kigali, IPRC Tumba, IPRC Karongi, IPRC Huye, IPRC Musanze, IPRC Gishari, IPRC Ngoma n’andi, ndetse biri muri gahunda ya Leta yo guha icyerekezo cyimbitse amashuri y’imyuga n’ubumenyingiro.
Minisitiri Ngirente yasabye urubyiruko rutaratangira amasomo muri Rwanda Polytechnic kwiyandikisha, kugira ngo bahabwe amahirwe nk’ay’abandi barangije, abizeza ko Guverinoma izakomeza kubashyigikira mu rugendo rwo kwiyubaka no guteza imbere igihugu.
