Ubuyobozi bwa Mount Kigali University nyuma y’uko butangaje ko mu rwego rwo kwirinda ikwirakwira rya Virusi ya Marburg, abanyeshuri bayo bagiye kumara icyumweru bigira ku ikoranabuhanga badahura mu buryo busanzwe, bongeye bashyira hanze itangazo ko gahunda yo kwiga imbona nkubone ikomeje nk’uko byari bisanzwe.
Mu itangazo iyi Kaminuza yashyize hanze kuri uyu wa 1 ukwakira 2024 yamenyesheje abanyeshuri na barezi ko gahunda yo kwiga imbona nkubone ikomeje ahubwo bagakomeza gukurikiza ingamba zo kwirinda Virusi ya Marburg.
Banditse bati “Turabamenyesha ko gahunda yo kwiga imbona nkubone ikomeje nk’uko byari bisanzwe, abanyeshuri n’abarezi bose barasabwa gukurikiza ingamba zose zo kwirinda bakita ku isuku no gukaraba intoki n’amazi meza n’isabune.”
Ku wa 27 Nzeri 2024 ni bwo Minisiteri y’Ubuzima (Minisante) yatangaje ko mu Rwanda habonetse abarwayi bafite ibimenyetso by’indwara y’umuriro mwinshi iterwa na virusi ya Marburg.
Mu rwego rwo gukumira iyi ndwara, kuri iki Cyumweru Minisiteri y’Ubuzima yashyize hanze amabwiriza agaragaramo ingingo y’uko ibikorwa byo gusura abarwayi mu mavuriro atandukanye byahagaritswe mu gihe cy’iminsi 14, mu kwirinda iyi ndwara.
