Minisitiri w’Ubuzima, Dr Sabin Nsanzimana, yatangaje ko mu gihe kitarenze amezi atandatu Ibitaro bya Kaminuza bya Kigali, CHUK, bizaba byamaze kwimurirwa i Masaka mu Karere ka Kicukiro.
Ni ibyo yagarutseho kuri uyu wa Kane, mu kiganiro yagiranye n’Abasenateri cyagarukaga ku ishyirwa mu bikorwa rya Politiki y’Ubuzima.
Minisitiri Dr Nsanzimana yavuze ko habura amezi make ibikorwa byo kwimurira Ibitaro bya CHUK i Masaka bigashyirwaho akadomo.
Ati “Harabura amezi make, duteganya ko muri Kamena cyangwa muri Kanama [2025] byose bizaba byarangiye.”
Yakomeje agaragaza ko ibikorwa byo kwimuka atari ibintu bikorwa huti huti kuko bisaba kwimura ibikoresho n’izindi serivisi zose, ku buryo ibikorwa by’ubuvuzi bidahungabana.
Ati “Ntabwo ari ukwimuka bihutiyeho kuko kwimura ibitaro, kwimura serivisi ni ibintu bigomba gutegurwa abaturage bakabimenya, ibyuma bigashyirwamo, ibikoresho bigashyirwamo mu buryo butuma serivisi zidahagarara.”
Dr Nsanzimana yavuze ko ahahoze CHUK hari serivisi z’ubuzima zizakomeza kuhatangirwa ndetse agaragaza ko agace ka Masaka kazimurirwamo ibi bitaro kahariwe serivisi z’ibijyanye n’ubuzima ku buryo hazajya hakurura ba mukerarugendo mu by’ubuvuzi.
Umushinga wo kwimura CHUK ikavanwa mu mujyi wa Kigali rwagati aho yari iri kuva mu 1965, ikajyanwa Masaka mu Karere ka Kicukiro watangiye mu 2018.
Ibitaro bizimurirwamo ibya Kaminuza bya Kigali, CHUK byatangiye kubakwa ku wa 30 Werurwe 2023. Biteganyijwe ko bizuzura bitwaye miliyari 85 Frw.
Bizaba bifite inyubako eshatu z’abarwayi zubatse mu buryo bw’amagorofa harimo izigeretse inshuro eshanu. Bizaba bifite kandi inyubako zikorerwamo ubushakashatsi, izo kwigishirizamo n’izindi. Bifite ibitanda 837 n’ubushobozi bwo kwakira abarwayi 2000 ku munsi.
