Inama y’Abamisitiri yateranye kuri uyu wa 17 Mutarama 2024, iyobowe na Perezida Paul Kagame yashyizeho abayobozi mu nzego zitandukanye.
Abayobozi bahawe inshingano barimo Mugwaneza Pacifique wari usanzwe ari Umuyobozi w’Agateganyo w’Ikigo cy’Igihugu gishinzwe guteza imbere Amakoperative, RCA, wagizwe Umusesenguzi wa Politiki y’Amakoperative muri Minisiteri y’Ubucuruzi n’Inganda, MINICOM.
Pacifique Mugwaneza yayoboraga mu buryo bw’agateganyo RCA kuva mu ntangiriro za 2023.
Itangazo rya Minisitiri w’Intebe ryo ku wa 28 Mutarama 2023, ni ryo ryahaye Pacifique Mugwaneza wari usanzwe ari Umuyobozi wungirije wa RCA, inshingano zo kuyiyobora by’agateganyo. Icyo gihe yasimbuye Prof Jean Bosco Harelimana wakuwe kuri uyu mwanya “kubera ibibazo by’imiyoborere.”
Mu zindi mpinduka zatangajwe n’Inama y’Abaminisitiri yo kuri uyu munsi, Dr Edward Kadozi yagizwe Umuyobozi w’Inama y’Igihugu y’Amashuri Makuru na Kaminuza, HEC, asimbuye Dr. Rose Mukankomeje, wari kuri uwo mwanya kuva ku wa 4 Ugushyingo 2019.
Abandi bahawe imyanya ni Dr Flora Mutezigaju wagizwe Umuyobozi wungirije w’Ikigo cy’Igihugu gishinzwe Uburezi bw’Ibanze, REB na Carlene Seconde Umutoni wagizwe Umuyobozi wungirije w’Ikigo cy’Igihugu gishinzwe Ibizamini n’Ubugenzuzi bw’Amashuri, NESA.
Inama y’Abaminisitiri kandi yashyizeho abahagarariye Ibitaro bya King Faisal ari bo Dr Thierry Kalisa wagizwe Umuyobozi Mukuru na Dr Natalie McCall wagizwe Umuyobozi wungirije.
Uretse gushyiraho abayobozi mu nzego zitandukanye, Inama y’Abaminisitiri yemeje imishinga y’amategeko atandatukanye irimo n’uw’irihindura Itegeko n° 066/2024 ryo ku wa 26/06/2024 rigena ingengo y’imari ya Leta y’umwaka wa 2024 /2025.
