Antoine Cardinal Kambanda yahaye ubwepiskopi Musenyeri Jean Bosco Ntagungira, waragijwe Diyosezi ya Butare asimbuye Musenyeri Filipo Rukamba wagiye mu kiruhuko cy’izabukuru.
Umushumba mukuru wa Kiriziya gatorika ku isi Papa Francisco, yagennye Padiri Jean Bosco Ntagungira nka Musenyeri wa Diyosezi ya Butare, ku wa 12 Kanama 2024.
Uyu muhango witabiriwe na Minisitiri w’ubutegetsi bw’igihugu Musabyimana Jean Claude n’abandi banyacyubahiro mu nzego zitandukanye. Ni umuhango kandi witabiriwe n’abakirisitu gatolika baturutse mu ma paruwasi 26 agize Diyosezi ya Butare.
Antoine Cardinal Kambanda yasabye Musenyeri Ntagungira kuba umushumba mwiza umenya intama ze, uzikunda urukundo rukwiriye kandi rutarobanura uwo ari we wese.
Ati “Ubwepiskopi si Icyubahiro ahubwo ni umurimo umuntu aba agomba gukora. Umwepiskopi agomba kuzirikana kuba ingirakamaro, Ujye wihatira kuronkera ingabire za bose, urabe umuyobozi n’umushumba w’indahinyuka, ujye wibuka iteka urugero rwa Yezu umushumba mwiza, we umenya intama ze kandi na zo zikamumenya. Abo Imana igushinze bose uzabakunde urukundo rwa Kibyeyi.”
Yasoje ubutumwa bwe amushyikiriza Ivanjiri irimo ijambo ry’Imana azifashisha abwiriza ubutumwa bwiza, anamushyikiriza inkoni y’ubushumba.
Umunyamabanga w’Ibiro by’Intumwa ya Papa mu Rwanda, yavuze ko Papa Francis yafashe umwanya muremure kugira ngo ahitiremo imbaga y’Imana iri i Butare umushumba uyibereye kandi uzayigezaho inkuru Nziza y’Umukiro wa Kristu.
Asoma ubutumwa bwa Papa Francis yagize ati “Urasabwa kuba umushumba mwiza, mu mvugo no mu ngiro, wubaha, ukaba umwizerwa kandi ukakira bose, bityo abakiristu ba Diyosezi uragijwe bazakubonemo isoko y’ishusho ya Kirisitu.”
