Emmanuel Ndindabahizi wabaye Minisitiri w’Imari muri Guverinoma y’Abatabazi mu gihe cya Jenoside akaza gukatirwa burundu n’Urukiko Mpuzamahanga Mpanabyaha rwashyiriweho u Rwanda (ICTR), yapfiriye muri Benin.
Ndirabahizi yari yaroherejwe n’Urukiko rwa ICTR muri Benin ngo ajye gukorerayo igifungo cya burundu.
Ikinyamakuru The TanznianTimes kivuga ko Aboubacar M. Tambadou, Gerefiye w’Urwego Mpuzamahanga Rwashyiriweho Gukora Imirimo y’Insigarira y’Inkiko Mpanabyaha (IRMCT), yashyikirije inyandiko Perezida w’urwo rwego Graciela Gatti Santana, zimumenyesha ko Ndindabahizi yapfuye ku wa 5 Ukwakira 2025 ahagana saa 4:30 z’igicamunsi i Cotonou muri Benin.
Iyo nyandiko yakozwe imenyesha Graciela Gatti Santana iby’urupfu rw’uwo mugabo, hashingiwe ku mwanzuro 31 (B) ugenga imikorere no kubika ibimenyetso muri IRMCT.
Mu mwaka wa 2004, ni bwo ICTR yari ifite icyicaro i Arusha muri Tanzania yataye muri yombi ikanaburanisha Emmanuel Ndindabahizi akurikiranyweho ibyaha bya Jenoside n’ibyibasiye inyokomuntu, imukatira igifungo cya burundu.
Mu mwaka wa 2009 yaje koherezwa muri Benin ngo abe ari ho ajya gusoreza icyo gifungo cy’ubuzima bwe bwose, yahawe nyuma yo guhamwa n’ibyaha byamuhamye ko yabikoreye mu yahoze ari Perefegitura ya Kibuye ari na gho akomoka.
Ndindabahizi yahamijwe gutera inkunga anongerera umurindi ibitero byagabwe ku Batutsi bari bahungiye ku mugozi wa Gitwa inshuro ebyiri zose.
Icyo gihe amagambo ya Ndindabahizi wari Minisitiri yatumye Abatutsi ibihumbi babura ubuzima, ICTR ikaba yarasanze ari mu bantu bagize uruhare rukomeye muri Jenoside yakorewe Abatutsi mu 1994.
