Kuri uyu munsi wa Noheri, Arikiyepiskopi wa Kigali Antoine Karidinali Kambanda yasangiye ifunguro rya ku manywa n’abantu barenga 500, mu buryo bwo kubafasha gukomeza kuryoherwa n’umunsi mukuru wa Noheri.
Ni igikorwa cyateguwe n’Umuryango w’Abalayiki witwa SANT’EGIDIO. Kigamije gufasha abantu kwizihiza noheri no gukomeza kubaherekeza mu buryo bw’iyobokamana n’iterambere.
Arikiyepisikopi wa Kigali Karidinali Kambanda yageneye ubutumwa abitabiriye uyu musangiro, bugaruka ku kwimakaza amahoro n’urukundo, ndetse ahamya ko umunsi wa Noheri ari umunsi w’ibyishimo by’inkuru nziza y’ivuka rya Yezu, bityo biryoha bisangiwe.
Uyu musangiro witabiriwe n’abantu batandukanye biganjemo abahuye n’ibibazo by’ubuzima birimo guterwa inda bakiri bato, abana bo ku muhanda ndetse n’abafite ubumuga butandukanye.
