Kuri uyu wa mbere, Perezida Kagame yageze i Nouakchott muri Mauritania, aho yitabiriye Inama Nyafurika yiga ku burezi no gushakira imirimo urubyiruko.
Ni inama yateguwe n’Umuryango wa Afurika Yunze Ubumwe, AU, ku bufatanye n’Ishami ry’Umuryango w’Abibumbye ryita ku Bana, UNICEF.
Amakuru atangazwa na Village Urugwiro avuga ko Perezida Kagame akigera muri iki gihugu yakiriwe na Perezida Mohamed Ould Ghazouani, usanzwe ari n’Umuyobozi wa AU.
Perezida Kagame yaherukaga muri Mauritania muri Gashyantare uyu mwaka aho yagiranye ibiganiro na mugenzi we Mohamed Ould, byagejeje ku ishyirwaho umukono ku masezerano yemerera indege za RwandAir gukora ingendo zijya n’iziva muri iki gihugu.
