Ku mugoroba wo kuri uyu wa mbere, i Abu Dhabi, Perezida Kagame yahuye na mugenzi we uyubora Nigeria, Bola Ahmed Tinubu, aho bitabiriye inama yiga ku Iterambere rirambye ya ‘Abu Dhabi Sustainability Week’.
Ni amakuru yanyujijwe ku rubuga rwa X, n’ibiro bya Perezida Kagame, kuri uyu wa mbere tariki ya 13 Mutarama 2025.
Nk’uko kandi byasangijwe n’ibiro bya Perezida Tibunu, hifashishijwe rubuga rwa X, aba bayobozi bombi baganiriye ku buryo bwo kurushaho gukorana hagamijwe guteza imbere abatuye umugabane wa Afurika.
Aba bakuru b’Ibihugu bahuriye i Abu Dhabi aho bitabiriye inama ya ‘ Abu Dhabi Sustainability Week’, igamije kwiga uburyo bwo kurushaho gufatanya mu kurwanya ingaruka z’ihindagurika ry’ikirere no gushaka ibisubizo.
Zimwe mu ngingo zigirwa muri iyi nama ni ugukoresha ingufu zisubizwa ndetse zitagira uruhare mu ihumana ry’ikirere, gukoresha ikoranabuhanga mu kurengera ibidukikije n’ibindi.
U Rwanda na Nigeria ni ibihugu bisanzwe bikorana bya hafi ndetse bifitanye amasezerano atandukanye arimo ubuvuzi, aho abaganga bo muri iki gihugu baza gutanga ubufasha no guhugura abo mu Rwanda.
Sibi gusa kuko ibi bihugu bifatanya no mubya politike na dipolomasi, umutekano, gutwara abantu n’ibintu hifashishijwe ingendo zo mu kirere, ikoranabuhanga n’ibindi.
