Perezida Kagame yagiranye ikiganiro n’Umunyamabanga wa Leta Zunze Ubumwe za Amerika, ushinzwe Ububanyi n’Amahanga Marco Rubio, kigendanye no gukemura burundu intandaro y’umutekano muke uri mu Burasirazuba bwa Repubulika Iharanira Demokarasi ya Congo.
Ni amakuru yatangajwe n’ibiro bya Perezida Kagame, ku rubuga rwa X, ku mugoroba wo ku wa kabiri, tariki ya 28 Mutarama 2025.
Ubutumwa bugira buti” Nagiranye ibiganiro byatanze umusaruro n’Umunyamabanga wa Leta Zunze Ubumwe za Amerika, Marco Rubio, kigendanye no guhagarika intambara iri mu Burasirazuba bwa RDC, no gukemura intandaro y’aya makimbirane burundu.”
Perezida Kagame yatangaje ko banaganiriye ku mubano w’u Rwanda na Leta Zunze Ubumwe za Amerika, ushingiye ku kubahiriza inyungu z’ibihugu byombi.
Yongeraho ati” Ntegererezanyije amatsiko gukorana n’Ubuyobozi bwa Perezida Trump, hagamijwe gushyira imbere ubwumvikane n’amahoro abaturage bo mu karere kacu bakwiye.”
U Rwanda na Leta Zunze Ubumwe za Amerika bisanganywe umubano umaze imyaka irenga 60, ndetse uyu mubano wabaye intandaro y’imikoranire igamije guteza imbere abaturage ahanini binyuze mu mishinga itandukanye ibihugu byombi bihuriraho.
Imikoranire hagati y’ibihugu byombi iri mu rwego rw’uburezi, ubuzima, ubukungu n’ubukerarugendo, ndetse u Rwanda ruhamagarira iki gihugu kiri mu bikomeye kugira uruhare mu gukemura ibibazo by’umutekano muke wo mu Burasirazuba bwa RDC.
Mu bihe bitandukanye Perezida Paul Kagame yagiye ashimangira ko ikibazo cy’umutekano muke kiri mu Burasirazuba kizakemurwa n’ibiganiro bivuye imuzi impamvu nyamukuru itera kurwana.
Ubwo yari mu kiganiro n’abanyamakuru cyo ku wa 9 Mutarama 2025, yavuze ko ibibazo byo mu Burasirazuba bwa RDC, bikomoka ku mateka y’icyo gihugu n’Amateka ya Afurika muri rusanjye, by’umwihariko mu gihe cy’Abakoroni bakata imbibi zihuza ibihugu byombi.
Yavuze ko umutwe wa M23 ugizwe n’abanye-Congo ndetse kuba barwana n’igisirikare cya Leta, FARDC, atari uko bakunze imirwano ahubwo ari uko baharanira uburenganzira bwabo.
Umukuru w’Igihugu ahamya ko abagize umutwe wa M23 atari abantu bagomba guhuzwa n’u Rwanda, ndetse ko bataturutse mu Rwanda, kuva na kera na kare, ahubwo Leta ya RDC yabasanze aho bari batuye ku mpamvu z’amateka.
