Mu gitondo cyo kuri uyu wa Kabiri, Perezida Kagame yahuye na mugenzi we uyobora Ibihugu Byunze Ubumwe by’Abarabu, Sheikh Mohamed bin Zayed al Nahyan, baganira ku bufatanye buganisha ku iterambere ry’ibihugu byombi.
Ni amakuru yatangajwe n’Ibiro bya Perezidansi y’u Rwanda, kuri uyu wa kabiri, tariki ya 14 Mutarama 2025.
Perezida Kagame yahuye na Sheikh Mohamed bin Zayed al Nahyan uyobora EAU, i Abu Dhabi, aho yitabiriye inama ya ‘Abu Dhabi Sustainability Week’ igamije kurebera hamwe ubufatanye mu guhangana n’ingaruka ry’ihindagurika ry’ibihe.
Aba bayobozi bombi baganiriye ku guteza imbere ubufatanye bufitiye inyungu ibihugu byombi ndetse no kwihutisha iterambere rirambye.
U Rwanda na UAE bisanzwe bifitanye imikoranire mu nzego zo gushora imari, haba mu bukerarugendo, gutunganya amabuye y’agaciro, gutwara ibintu, n’ubwikorezi bukoreshejwe ikoranabuhanga.
Ibihugu byombi kandi bifitanye ubufatanye mu bijyanye n’amahoteli, ubuzima, uburezi, gusangizanya udushya, kwita ku bidukikije no guha buruse Abanyarwanda bajya kwiga muri UAE, ndetse bakabona n’akazi.
Muri Gashyantare 2024, u Rwanda na UAE byashyize umukono ku masezerano y’ubufatanye mu bijyanye n’umutekano no kurwanya iterabwoba. Yasinyweho na Gasana Alfred wari Minisitiri w’Umutekano na mugenzi we wa UAE, General Sheikh Saif bin Zayed Al Nahyan.
