Perezida Paul Kagame yavuze ko ibibazo by’umutekano muke biri mu Burasirazuba bwa Repubulika Iharanira Demokarasi ya Congo, bituruka ku mateka y’iki gihugu na Afurika muri rusang ndetse ashimangira ko abaharwanira atari Abanyarwanda, ahubwo ari Abanye-Congo baturutse muri Uganda.
Perezida Kagame wari mu kiganiro n’Abanyamakuru kuri uyu wa kane, tariki ya 9 Mutarama 2025, yavuze ko ikibazo cy’umutekano muke kiri mu Burasirazuba bwa RDC gituruka ku mateka y’iki gihugu n’ay’Abakoloni baje muri Afurika.
Ati “Icyo kibazo gifite imizi mu mateka y’icyo gihugu, amateka y’Akarere ndetse n’amateka y’Umugabane wacu, yatangiriye muri ibyo bihe by’Ubukoloni.”
Yavuze ko aba bantu barwanira mu Burasirazuba bwa Congo badakwiriye guhuzwa n’u Rwanda cyangwa ngo bitwe Abanyarwanda kuko abenshi RDC yabasanze aho bari batuye.
Ati “Ntabwo habayeho kuva mu Rwanda. Congo yasanze bariya bantu hariya, bifite aho bihuriye n’amateka y’Ubukoloni, ni yo mpamvu abayobozi ba Congo rimwe bemera ko ari Abanya-Congo, ubundi bagashaka impamvu z’uko imirwano ishyigikiwe n’u Rwanda, ariko ntibashobora kuvuga no kwemeza ko abarwana baturutse mu Rwanda.”
Yakomeje agaragaza ko Umutwe wa M23 ugizwe n’Abanye-Congo, ndetse abayobozi bawo na benshi mu barwana ari abari barahungiye muri Uganda, atari abakomoka mu Rwanda cyangwa bahavuye bajya kurwana muri Congo.
Ati “Imirwano yatangijwe n’abari muri Uganda, ni gute ikibazo gihinduka icy’u Rwanda? Aba bantu bayobora M23 n’abandi barenga 1000 barwanira mu Burasirazuba bwa Congo ntaho bahuriye n’u Rwanda.”
Perezida Kagame akomeza agaragaza ko impamvu u Rwanda rushyirwa mu majwi mu kibazo cy’umutekano muke ari uko bamwe mu bahatuye bavuga Ikinyarwanda no kuba hari abahatuye bari mu Mutwe wa FDLR basize bakoze Jenoside mu Rwanda.
Ati “Impamvu u Rwanda ruvugwamo, icya mbere ni ko bariya ari abantu bavuga Ikinyarwanda, birashoboka ko ari ryo kosa bazira hariya muri Congo. Indi mpamvu ni FDLR imaze imyaka 30 muri Congo yasize ikoze Jenoside. Ntekereza ko amahanga yababungabunze, ntazi impamvu niba ari impano yo kuba barakoze Jenoside cyangwa kubera barwanya u Rwanda na Leta.”
Umukuru w’Igihugu agaragaza ko ingabo ziri mu butumwa bw’amahoro bw’Umuryango w’Abibumbye mu Burasirazuba bwa RDC, zagiye zigamije gusenya FDLR ariko bitakozwe, ahubwo ubu ari bo bashinja u Rwanda umutekano muke.
Ati “Nyuma y’imyaka 30, ubajije Loni icyabaye, icyo bakoze mu myaka 30 ishize, na miliyari y’amadolari bashoyemo, ni ikihe bakwerekana bagezeho mu mbaraga bakoresheje? Ni ugushinja gusa u Rwanda ibintu byose bibera mu Burasirazuba bwa Congo? Ni Congo yose kuko ibibazo byaho bishyirwa ku Rwanda.”
Perezida Kagame akomeza agaragaza ko ibibazo bya RDC bikomeza kugerekwa ku Rwanda, ndetse n’imiryango Mpuzamahanga ikabafasha, nyamara RDC ikwiye gufata inshingano ku baturage n’igihugu.
Akomeza agaragaza ko iyo u Rwanda ruba rutariho cyangwa ruri ahandi ku Isi ibibazo bya RDC n’ubundi biba bigihari, kuko ari ibibazo bikwiriye kuba bikemurwa biturutse mu mizi y’ikibitera.
Yakomoje kandi ku mahanga agizwe n’ibihugu byakolonije Akarere, birema amatsinda yabigize impuguke bashinzwe kugaragaza uko umutekano uhagaze, nyamara birengagije ukuri kw’ibihari.
Perezida Kagame agaragaza ko umuntu ashaka kumenya ukuri kw’ibibazo biri mu Burasirazuba bwa RDC ndetse n’uburyo byakemuka bidasaba kuba impuguke, ahubwo bisaba ubushake bwo kwemerera abantu kugira amahoro.
Ati “Umbajije icyo ntekereza cyakurikira, ni icyo nsanzwe mvuga ndanguruye, nkibwira buri wese ushaka kumva. Iki kibazo cyakemuka, cyarangira, cyakabaye cyararangiye kera ariko ntabwo wagikemura binyuze mu kuyobya abantu, mu mikino.”
