Perezida Paul Kagame yagaragaje ko urubyiruko ari amizero ya Afurika ndetse n’Isi muri rusanjye, ariyo mpamvu rukwiye gufashwa rugahabwa ubumenyi butuma rugera ku rwego rwo guhangana kw’isoko ry’umurimo.
Ni ibyo Perezida Kagame yagarutseho ku wa 10 Ukuboza 2024, i Nouakchott muri Maurtanie aho yari yitabiriye Inama Nyafurika yiga ku Burezi no gushakira imirimo urubyiruko, ifite insanganyamatsiko igira iti “ Kwigisha urubyiruko rwacu no kurutoreza Afurika ishyize hamwe, iteye imbere kandi ikwiye.”
Perezida Kagame yavuze ko ahazaza h’Umugabane wa Afurika hashingiye ku rubyiriko rwo rugize umubare munini w’abatuye uyu Mugabane, agaragaza ko rukwiye guhabwa ubumenyi burutegura guhangana kw’isoko ry’umurimo.
Ati “Iki kiragano gishya gifite ubushobozi bwo kuba inkingi mwikorezi y’iterambere n’uburumbuke, bitari gusa kuri Afurika, ahubwo ku Isi muri rusange. Icyo dukeneye gukora ni uguha uru rubyiruko ubumenyi n’ubuhanga byo kugira ngo babashe guhangana ku isoko ry’umurimo.”
Perezida Kagame yagaragaje ko buri mwana akwiye guhabwa amahirwe yo kwiga, avuga ko Afurika igihura n’imbogamizi yo kubura ingengo y’imari ihagije yo gushyigikira uburezi ndetse yerekana ibisubizo bibiri byakemura iki kibazo, birimo kuba Afurika igomba gukoresha neza umutungo ifite no kwirinda kwishingikiriza ku nkunga z’amahanga.
Perezida Kagame yavuze ko ibigo n’imiryango mpuzamahanga bisabwa gukorera hamwe naza Guverinoma kugirango hongerwe ubushobozi, ndetse agaruka ku kibazo cy’urubyiruko rwa Afurika rujya gushaka ubumenyi hanze y’uyu mugabane, asaba ibihugu bya Afurika kongera imbaraga urubyiruko kuko ari amizero yejo hazaza.
