Perezida Paul Kagame akaba n’Umugaba w’Ikirenga w’Ingabo z’u Rwanda, yageneye ubutumwa busoza umwaka inzego z’umutekano z’u Rwanda, ashimira umusanzu n’umuhate wazo mu gukorera igihugu no kubungabunga umutekano.
Ni ubutumwa Perezida Kagame yageneye inzego z’umutekano abashimira umusanzu wabo mu gukorera igihugu, ati” Umuhate wanyu, imitwarire myiza n’ubunyamwuga byakomeje gushimangira indangagaciro n’umutekano by’igihugu cyacu no mu bihe bigoye, haba mu gihugu ndetse no ku rwego mpuzamahanga.”
Yabibukije ko akazi bakora gasobanura byinshi ku kwigira ku Rwanda, ndetse n’ikitegererezo cy’amahoro, umutekano n’iterambere ry’igihugu.
Perezida Kagame yavuze ko mu myaka 30 u Rwanda rumaze rwibohoye n’indi myaka 20 ingabo z’u Rwanda zimaze zikora ubutumwa bw’amahoro mu Muryango w’Abibumbye, byerekana umuhate w’u Rwanda mu kugera ku iterambere.
Umukuru w’Igihugu yavuze ko Ingabo z’u Rwanda zigira uruhare rukomeye mu guharanira umutekano n’imibereho myiza y’abaturage, ndetse abashimira indangagaciro, gukorera hamwe n’imyitwarire myiza bakorana akazi mu guhangana n’ibibazo by’umutekano mucye.
Yakomeje abasaba gukomeza guharanira kugendera ku mahame y’ubunyangamugayo, abasaba gukomeza kuba maso no gukomeza guhangana n’ibibazo by’umutekano no kugera ku ntego yo kugira u Rwanda rutekanye, ruteye imbere kandi rw’unze ubumwe.
Umukuru w’Igihugu yageneye ubutumwa imiryango ifite ingabo zaguye mu kazi, abizeza ko Leta y’u Rwanda izakomeza kubaba hafi, ndetse asoza muri rusanjye abifuriza iminsi mikuru myiza n’umwaka mushya muhire.
