Perezida Kagame yahuye na Minisitiri w’Ububanyi n’Amahanga w’Igihugu cya Papouasie Nouvelle Guinée, James Marape baganira ku buryo bwo kunoza umubano n’ubufatanye hagati y’ibihugu byombi.
Aya makuru yatangaje n’ibiro bya Perezida ku rubuga rwa X, aho banditse bati” Perezida Kagame yahuye na Minisitiri w’Intebe akaba na Minisitiri w’Ububanyi n’Amahanga n’umutungo wa Papouasie Nouvelle Guinée, James Marape uri muri Apia ku bwa CHOGM2024. Baganiriye ku buryo bwo kongerera imbaraga umubano hagati y’ibihugu byombi.”
Aba bayobozi bombi bahuye kuri uyu wa Kane, tariki ya 24 Ukwakira 2024, aho bari mu birwa bya Samoa, bitabiriye Inama y’Abakuru b’Ibihugu na za Guverinoma y’Umuryango Commonwealth, ugizwe n’ibihugu bivuga Icyongereza (CHOGM).
Inama ya CHOGM itegerejwe ku wa gatanu tariki ya 25 Ukwakira 2024, yabanjirijwe n’ibindi bikorwa birimo ibiganiro byahuje urubyiruko rwo muri Commonwealth, inama yahuje aba Minisitiri b’Ububanyi n’Amahanga, ibiganiro ku burenganzira bw’abagore n’ibindi.
