Perezida Paul Kagame yakiriye Minisitiri w’Intebe wa Lesotho, Samuel Ntsokoane Matekane uri i Kigali aho yitabiriye inama ya YouthConnekt Africa, baganira ku kwagura umubano w’u Rwanda na Lesotho.
Perezida Kagame niwe wafunguye kumugaragaro iyi nama iri kubera muri Kigali Convection Center guhera tariki ya 8-10 Ugushyingo 2024, ndetse atanga ikiganiro yahuriyemo na mugenzi we Minisitiri w’Intebe wa Lesotho, Samuel Ntsokoane Matekane na rwiyemezamirimo wo muri Kenya Madam MumbiNdung’u washinze Ikigo cya Power Learn Project.
Iyi nama ibaye ku nshuro ya karindwi yitabiriwe n’urubyiruko rugera ku 3000 rwaturutse mu bihugu 33 bitandukanye by’Afurika, aho bari kuganira ku buryo bwo guhanga imirimo binyuze mu kwigishwa mu buryo budasanzwe.
Nyuma y’iyi nama Perezida Paul Kagame yagiranye ikiganiro cyihariye na Minisitiri wa Lesotho, Samuel Ntsokoane Matekane, bigaruka ku kwagura umubano n’ubutwererane hagati y’u Rwanda n’Ubwami bwa Lesotho.
Guverinoma y’u Rwanda n’Ubwami bwa Lesotho baherutse gusinya amasezerano y’imikoranire azagira uruhare mu gufasha ibihugu byombi kwagura imikoranire igamije inyungu ku mpande zombi.
Aya masezerano yasinywe ubwo Minisitiri w’Intebe, Dr. Edouard Ngirente, yari muri Lesotho aho yari yitabiriye ibirori byo kwizihiza imyaka 200 ubwami bwaho bumaze bushinzwe ndetse na 58 bumaze bwigenga.
.
