Perezida Kagame uri i Buku muri Azerbaijan yahuye n’igikomangoma Al Hussein bin Abdullah, baganira ku mubano mwiza ufitiye inyungu u Rwanda na Jordan.
Ku wa kabiri nibwo Perezida Kagame yageze i Baku muri Azerbaijan, aho yari yitabiriye Inama ya 29 y’Umuryango w’Abibumbye yiga ku mihindagurikire y’ibihe (COP29).
Ibiro bya Perezida Kagame byatangaje ko yahuye n’igikomangoma cya Jordanie, Al Hussein bin Abdullah, baganira ku mubano mwiza usanzwe hagati y’ibihugu byombi.
U Rwanda n’u Bwami bwa Jordan bisanzwe bifitanye umubano ukomeye, washibutse mu masezerano ibihugu byombi bigenda bisinya arimo gukuraho Visa ku Banyarwanda bifuza kujya muri Jordan.
Ibi bihugu byombi kandi bisanzwe bifitanye amasezerano ajyanye no kudasoresha ibicuruzwa kabiri, ay’ubufatanye mu buhinzi, ubucuruzi, ubukungu, ndetse no guhana ibitekerezo mu bya Politiki.
