Perezida Kagame yahawe igihembo cy’Umunyafurika wagaragaje umutima wo guteza imbere Afurika no kuba umuyobozi w’indashyikirwa kandi uharanira impinduka nziza kuri uyu mugabane.
Ibi bihembo bigenerwa abayobozi mu bya politiki n’ubucuruzi bizwi nka ‘All Africa Business Leaders Awards’ (AABLA), bitegurwa na CNBC Africa, bikaba byatanzwe kuri uyu wa Kane tariki ya 24 Ukwakira 2024, muri Afurika y’Epfo.
Ambasaderi w’u Rwanda muri Afurika y’Efpo, Emmanuel Hategekimana niwe wahagarariye Perezida Kagame yakira iki gihembo.
Mu butumwa yanyujije ku rubuga rwa X yagize ati” Perezida Kagame yatuye iki gihembo abagabo, abagore n’urubyiruko benshi cyane, bakora ubutaruhuka mu kubuka aAfurika ikomeye kandi iteye imbere.”
Yakomeje avuga ko Perezida Kagame yashimiye abategura ibi bihembo, ati” Mureke dukomeze kuyoborana intego, guteza imbere guhanga ibishya, ndetse no kubera icyitegererezo abayobozi ba Afurika bazadukurikira. Dufatanyije, twakubaka Afurika itari kwihuta gusa, ahubwo Afurika ishobora kugena ahazaza hayo ndetse no kugena icyerekezo cy’Isi muri rusange.”
Abategura ibi bihembo bavuze ko Perezida Kagame ashimirwa umutima wo guteza imbere Afurika no kuba umuyobozi w’indashyikirwa, ndetse akaba aharanira impinduka nziza kuri uyu mugabane.
Mu mwaka wa 2018 Perezida Kagame nabwo yahawe igikombe nk’iki.
