Perezida Kagame yahuye na Stefan Oelrich, uyobora Ikigo Bayer Pharmaceuticals na Dr Shaheer Bardissi, uyobora Minapharm Pharmaceuticals, baganira ku ishoramari rirambye mu gukora imiti n’inkingo ku Mugabane wa Afurika.
Ibiro by’Umukuru w’Igihugu bibinyujije ku rukuta rwa X byatangaje ko Perezida Kagame yakiriye Stefan Oelrich na Dr Shaheer Bardissi ku mugoroba wo ku wa Kane, tariki ya 9 Mutarama 2025.
Ubwo butumwa bugira buti “Perezida Kagame yahuye na Stefan Oelrich, Umuyobozi Mukuru w’Ikigo Bayer Pharmaceuticals na Dr Shaheer Bardissi, Umuyobozi Mukuru w’Ikigo Minapharm Pharmaceuticals, baganira ku ishoramari mu gukora mu buryo buteye imbere imiti n’inkingo muri Afurika.’’
Ikigo Bayern Pharmaceuticals gikorera mu Budage mu gihe Minapharm ikorera mu Misiri, bikorana n’Ishami rya BioNTech riri mu Rwanda mu kurushaho gushakira Afurika ibisubizo birambye mu kubungabunga ubuzima bw’abantu.
Mu gihe cy’Icyorezo cya Covid-19, ibihugu byiganjemo ibiri mu nzira y’amajyambere byagowe no kugerwaho n’inkingo ndetse ni bwo u Rwanda na Afurika muri rusange byatangiye kwishakamo ibisubizo birambye by’ubuvuzi, hafungurwa ishami ry’Ikigo BioNTech gikora inkingo.
Ibi byashimangiwe na Perezida Kagame ubwo yari mu muhango wo kuritangiza mu 2023. Icyo gihe yagize ati “Twisanze dukomanga kuri buri muryango dushaka doze [z’inkingo]…Byari ibintu bitakwihanganirwa, Umuryango w’Ubumwe bwa Afurika wiyemeza gushyira hamwe no kwiyemeza ko ibi bitazongera kutubaho.”
Iri shami rya mbere rya BionTech muri Afurika ryatangiriye mu Rwanda, ariko rifite intego yo kugera no mu bindi bihugu bya Afurika birimo Afurika y’Epfo, Senegal na Ghana.
