Ku wa Kane, tariki ya 21 Ugushyingo 2024, Perezida Kagame yakiriye Ambasaderi wari uhagarariye Sudani y’Epfo mu Rwanda, Simon Juach Deng, ugiye gusoza izi nshingano.
Ibiro by’umukuru w’Igihugu, Village Urugwiro byanyujije ubutumwa ku rubuga rwa X buvuga ko Perezida Kagame yakiriye Ambasaderi Juach Deng ugiye gusoza inshingano ze mu Rwanda.
Ambasaderi Deng yatangiye imirimo ye mu Rwanda muri Gashyantare 2023, nyuma yo kwemezwa n’inama y’aba Minisitiri yateranye ku itariki ya 31 Mutarama muri uwo mwaka.
Ambasaderi Simon Juach Deng yari ahagarariye Sudani y’Epfo mu Rwanda ariko icyicaro cye cyari i Kampala muri Uganda.
U Rwanda na Sudani y’Epfo bifitanye umubano mu bya politiki aho Ingabo z’u Rwanda ziri mu butumwa bw’Umuryango w’Abibumbye bwo kubungabunga amahoro muri Sudani y’Epfo, UNMISS, ibikorwa zihuza no gutanga umuganda muri ibyo bice no gutanga serivisi z’ubuvuzi.
