Kuri uyu wa Gatandatu, Perezida Kagame yakiriye mugenzi we wa Togo, Faure Essozimna Gnassingbé, wagiriye uruzinduko rw’iminsi ibiri mu Rwanda.
Ni amakuru yatangajwe n’Ibiro bya Perezida Kagame, Village Urugwiro, bibinyujije ku rubuga rwa X [rwahoze ari Twitter].
Ubutumwa bugira buti “Ku gicamunsi cyo kuri uyu wa Gatandatu, ku Kibuga Mpuzamahanga cy’Indege cya Kigali, Perezida Kagame yakiriye mugenzi we wa Togo, Faure Essozimna Gnassingbé, watangiye uruzinduko rw’iminsi ibiri mu Rwanda.”
U Rwanda na Togo bisanzwe bifitanye umubano mwiza ushingiye ku bufatanye mu bijyanye n’ubuvuzi, ikoranabuhanga na politiki, ingendo zo mu kirere, ubuhinzi n’ibindi.
Perezida Kagame na mugenzi we Gnassingbé bagiye bahurira mu nama zitandukanye zirimo Transform Africa n’izindi zimbere mu gihugu na mpuzamahanga, baganira ku iterambere ry’ibihugu byombi na Afurika muri rusange.
Perezida Gnassingbé yaherukaga mu Rwanda muri Kanama 2024, ubwo yari yitabiriye irahira rya Perezida Paul Kagame, mu muhango wabereye muri Stade Amahoro.
