Ku Cyumweru, Perezida Kagame yakiriye itsinda ryo muri Leta ya Oromia yo muri Ethiopa, riyobowe na Perezida wayo, Shimelis Abdisa baganira ku mubano w’impande zombi.
Ni ubutumwa bwasangijwe n’ibiro bya Perezida Kagame, ku rubuga rwa X, ku Cyumweru, tariki ya 12 Ukwakira 2025.
Ubu butumwa bugira buti “Perezida Kagame yakiriye Perezida wa Leta ya Oromia yo muri Ethiopa, Shimelis Abdisa n’itsinda bari kumwe, baganira ku mubano w’impande zombi.”
Oromia ni ubutaka bugize igice kinini cya Ethiopia, bungana na kilometero kare zirenga ibihumbi 350, hakaba hatuwe n’abaturage basaga miliyoni 40.
Shimelis Abdisa ayoboye iki gice kuva muri Mata 2019, ndetse akaba ari n’umwe mu bajyanama b’igihe kirekire ba Minisitiri w’Intebe wa Ethiopia, Abiy Ahmed.
U Rwanda na Ethiopia ni ibihugu bisanganywe umubano mwiza ndetse bifitanye amasezerano yasinywe mu 2024 y’ubufatanye mu ngeri eshanu ari zo politiki n’ubujyanama, ubucuruzi, siporo, kugabanya ibiza no kubicunga ndetse n’ishoramari.
Ibi bihugu byombi kandi bifitanye amasezerano y’ubufatanye kuri serivisi z’ingendo zo mu kirere zikorwa na RwandAir na Ethiopian Airlines.
