Perezida Paul Kagame uri mu ruzinduko muri Qatar yahuye na Emir wa Qatar, bagirana ibiganiro ndetse bakurikira isiganwa rya Formula 1 rya Qatar Grand Prix.
Amakuru aturuka mu biro ntaramakuru bya Qatar, avuga ko Perezida Paul Kagame yageze muri Qatar ku Cyumweru, tariki ya 1 Ukuboza 2024, aho yari yitabiriye isiganwa rya 23 rya Qatar Grand Prix, ribanziriza irya nyuma rya 24.
Perezida Paul Kagame yakiriwe n’Umunyamabanga muri Minisiteri y’Ububanyi n’Amahanga, Dr. Ahmed bin Hassan Al Hammadi na Ambasaderi w’u Rwanda muri Qatar, Igor Marara Kainamura.
Perezida Kagame ari kumwe na Emir wa Qatar, Sheikh Tamim bin Hamad Al Thani bitabiriye isiganwa rya Formula 1, ryabereye mu muhanda Lusail International Circuit.
Bibaye mu gihe u Rwanda ruri kwitegura kwakira inama y’ishyirahamwe ry’umukino wa Formula 1, FIA, ndetse rwahawe amahirwe yo kwerekana aho rugeze rutegura iyi nama, n’amahirwe ari mu bukerarugendo bw’u Rwanda binyuze muri ‘Visit Rwanda’.
Iri rushanwa si irya mbere Perezida Kagame yitabiriye kuko yagiye mu yandi nka Singapore Grand Prix ya 2024, ndetse yitabiriye niya 2022.
Perezida Kagame yaherukaga muri Qatar muri Gashyantare uyu mwaka, mu rugendo rw’akazi aho yahuye na Emir wa Qatar, bagirana ibiganiro bigaruka ku mubano w’ibihugu byombi.
