Perezida Kagame yongeye kugaragaza ko ikibazo cy’umutekano muke uri mu Burasirazuba bwa Repubulika Iharanira Demokarasi ya Congo, kidashobora gukemuka burundu kidashakiwe igisubizo kirambye, ndetse anenga bimwe mu bihugu by’amahanga bigaragaza kubogamira ku ruhande rumwe.
Ni ibyo yagarutseho mu muhango wo kwakira ku meza abadipolomate bakorera mu Rwanda, wabereye muri Kigali Convention Center, ku gicamunsi cyo kuri uyu wa Kane, tariki ya 16 Mutarama 2025.
Perezida Kagame yagarutse ku kibazo cy’umwuka mubi uri hagati y’u Rwanda na RDC, asubiza abavuze ko yanze kujya mu biganiro bya Luanda, byo ku wa 15 Ukuboza 2024, yari buhuriremo na Perezida wa RDC, Etienne Tshisekedi we wari wahageze.
Yagize ati “Hari abashinje u Rwanda ko rutagiye i Luanda. Ndi inshuti n’abanya-Angola, ndi inshuti na Perezida wabo, ariko ntabwo nari ngiye kubasura, rwari uruzinduko rwo gukemura ibibazo, ntiyari amahirwe tubonye yo gufata amafoto. Oya.”
Yakomeje avuga ko u Rwanda ari igihugu cyiteguye gukemura ibibazo kuko gikeneye amahoro, bitewe n’uko cyanyuze mu bihe by’umutekano muke, bityo ruzi neza igisobanuro cyo kutayagira.
Ati “Twese (u Rwanda na RDC) dukeneye amahoro. Nako u Rwanda rukeneye amahoro kurusha undi uwo ariwe wese, kubera ko twasogongeye ku kuba nta mahoro dufite, tuzi igisobanuro cyabyo.”
Yakomeje avuga ko hari ibihugu bikomeye bivuga kuri aya makimbirane ariko bikagaragaza uburyarya no kubogama, atanga urugero rw’ibyavuzwe ku matora yabaye mu Rwanda muri Kanama 2024, nyamara ntibigire icyo bivuga ku matora yabaye muri RDC inshuro ebyiri, bizi neza ko Perezida atatowe n’abaturage.
Ati “Umuntu uri guteza iki kibazo, hagati y’u Rwanda na RDC ntabwo yigeze atorwa inshuro ebyiri, kandi namwe murabizi.”
“Uyu mugabo Tshisekedi ntiyigeze atorwa bwa mbere, kandi murabizi, ntawe mbibwiye ubu, igihari ni uko mutabivuga mu ruhame, njye mbivuze mu ruhame, ni ryo tandukaniro. Ku nshuro ya kabiri nta cyabaye kandi murabizi. Rero ni izihe ndagagaciro mushyiriraho bamwe abandi ntimumenye icyo gukora?”
Perezida Kagame yakomeje abwira abadipolomate ko bamwe muri bo bahagarariye ibihugu biteza ibibazo, ariko nta kundi byagenda kuko bagomba gutanga amakuru bakwiye gutanga.
