Perezida Paul Kagame yasabye abayobozi bagize Umuryango wa Afurika y’Iburasirazuba kumva neza imvano y’ikibazo kiri mu Burasirazuba bwa Repubulika Iharanira Demokarasi ya Congo, agaragaza ko mu gihe hakomeje kubaho kubogamira ku ruhande rw’inyungu zimwe, aho kuba inyungu za rusange, ikibazo cy’umutekano muke kitazigera gihosha.
Ni ibyo yagarutseho ku mugoroba wo ku wa Gatatu, mu nama yahuje abayobozi b’ibihugu bigize EAC, hagamijwe gushakira umuti intambara iri mu Burasirazuba bwa RDC, yatumye Umutwe wa M23 ufata Umujyi wa Goma, nyuma y’imirwano ikomeye yahuriyemo n’igisirikare cya Congo, FARDC.
Iyi nama yari yatumijwe n’Umuyobozi wa EAC, Perezida William Ruto yitabiriwe n’abakuru b’ibihugu by’ibinyamuryango, uretse Perezida wa RDC, Félix Tshisekedi, wari watangaje ko atari bwitabire iyi nama bitewe n’intambara iri mu Burasirazuba bw’igihugu cye.
Perezida Kagame yagaragarije aba bakuru b’ibihugu ko mu gihe hatabayeho kureba imvano y’ikibazo gitera kutagoheka kw’abarwana mu Burasirazuba bwa RDC, ubundi ibisubizo bishakwe bigendewe ku bihari, hatazigera habaho gukemuka kw’icyo kibazo.
Ati “Ndashaka ko ibyo turi buvuge, n’ibyo dutekereza gukora, tubanza kumva neza imiterere y’ibihari ubundi dukomerezeho, wenda bishobora kugira aho bitugeza. Ubundi nidukomeza kwivuga ibyiza, tukigira beza, buri wese agakomeza kureba inyungu ze, kuruta kureba inyungu za rusange nk’Uburasirazuba bwa Afurika, simbona uburyo tuzatanga umusanzu mu gukemura ikibazo.”
Mu ntangiriro z’icyumweru ubwo M23 yatangazaga ko yafashe umujyi wa Goma, itsinze igisirikare cya Congo n’indi mitwe myinshi bakorana, abagize FARDC ifatanyije n’umutwe w’iterabwoba wa FDLR bahisemo kurasa amasasu menshi ku butaka bw’u Rwanda, ndetse agahitana abagera ku icyenda.
Perezida Kagame yagaragaje ko iki gikorwa cyo kurasa ku butaka bw’u Rwanda no kwica Abanyarwanda hari uburyo bizakurikiranwa.
Ati “Mu minsi ibiri cyangwa itatu ishize twapfushije abantu, habayeho kurasa cyane guturutse mu Burasirazuba bwa Congo, i Goma. Hapfuye abantu babarirwa mu binyacumi, hakomereka abarirwa mu majana, ibyo mu buryo budashidikanywaho tuzabyitaho. Nta kubishidikanyaho.”
Perezida Kagame kandi yagaragaje ko abarebwa n’ikibazo kiri mu Burasirazuba bwa Congo ari bo bagomba kuba aba mbere mu kugishakira igisubizo, ubundi akaba ari bwo basaba ubufasha bakabuhabwa.
Avuga ko abarwana mu Burasirazuba bwa Congo barwanira uburenganzira bwabo bambuwe mu myaka irenga 20 ishize, bahowe abo bari bo, ndetse bahungira mu bihugu nk’u Rwanda ubu bakaba baratuye.
Ati “Bakuye abantu mu byabo, barabishe barabatoteza buri munsi kubera abo bari bo. Dufite impunzi zimaze hano imyaka 20 irenga, zirukanywe muri Congo zihungira mu Rwanda, zihorwa ko ari ubwoko bw’Abatutsi, ndetse babaye ab’u Rwanda, ntibakiri ababo.”
Yakomeje agaragaza ko mu Burasirazuba bwa RDC, hari ingabo zitandukanye birimo MONUSCO, SAMIDRC, u Burundi ndetse bafashwe n’imitwe y’iterabwoba nka FDLR, mu kurwanya abanyagihugu.
Yongeyeho ko ibyo byose imiryango mpuzamahanga yabirebereye gusa, kugeza ubwo Umujyi wa Goma ufashwe, hagatangira kumvikana amajwi avuga kwangiza uburenganzira bwa muntu, kandi nyamara n’abakurwa mu byabo n’abagizwe impunzi bakwiriye ubwo burenganzira bwa muntu.
