Perezida Paul Kagame witabiriye inama ya karindwi ya YouthConnekt Africa yagaragaje uburyo kuba mu nkambi byatumye amenya ko ibibazo byose u Rwanda rwanyuzemo byaterwaga n’ubuyobozi bubi.
Kuri uyu wa gatanu, tariki ya 8 Ugushyingo 2024, Perezida Kagame yaganirije urubyiruko rurenga 3000 rwitabiriye inama ya YouthConnekt Africa iri kubera muri Kigali Convection Center.
Perezida Kagame yagaragarije urubyiruko ko ubuzima butari bwiza babayemo mu gihe cy’ubuhunzi bwaterwaga n’ubuyobozi bubi bwariho, ariko ko hari amasomo byabasigiye.
Ati” Ibintu byose byari uko bitagakwiye kuba bigenda. Ayo ni amasomo twize, hari ikitaragendaga. Ariko iyo urebye ibyabaga icyo gihe mu myaka ya za 1960, hari ibiri kuba ubu, turacyafite abantu bari kunyura mu bibazo kubera politiki, imiyoborere mibi.”
Perezida Kagame yagaragaje ko ubu igihugu kigeze kure ugereranyije nuko cyahoze mu myaka irenga 45 ishize, ndetse asaba urubyiruko kwigira kuri aya mateka yaba ay’ibihugu byabo cyangwa iby’abandi.
Minisitiri w’Intebe wa Lesotho, Samuel Ntsokoane Matekane, nawe witabiriye iki kiganiro, yavuze ko urubyiruko rw’uyu munsi rudakwiye kujyanwa mu mirimo yo mu rugo, ahubwo rukwiye guhabwa ubumenyi bwo gukora akazi no kwihangira imirimo.
Ati” Ibi bintu by’urubyiruko rwacu ruri kujya mu bucuruzi kandi rukagira amahirwe y’akazi, ni ikintu cyiza kandi turagishyigikiye. Bamwe mu rubyiruko rwacu ni abahanga mu guhanga ibishya. Tugenda tubona ibintu byiza biba biturutse kuri rwo.”
Rwiyemezamirimo wo muri Kenya akaba n’uwashinze Ikigo Power Learn Project, Mumbi Ndung’u, nawe waganirije urubyiruko, yarusabye kugira amakuru y’ibibera kw’Isi kuko bifasha mu kumenya ibyo bashobora gukora, ndetse asaba inzego zishinzwe urubyiruko kugira uruhare mu kurubonera icyo rukora kuko aribyo bizafasha mu iterambere.
Inama ya YouthConnekt ibaye ku nshuro ya karindwi yatangiriye mu Rwanda muri 2012, ariko kugeza ubu igirwamo uruhare n’ibihugu 33 byo muri Afurika.
