Perezida Paul Kagame yagarutse ku bihe by’ingenzi byaranze umwaka ugiye kurangira wa 2024, ashimira Abanyarwanda kubwo amahitamo meza n’uruhare mu kugera ku iterambere igihugu cyari kihaye muri uyu mwaka.
Nibyo Perezida Paul Kagame yagarutseho mu birori byatumiwemo abantu mu ngeri zitandukanye, ku mugoroba wo kuwa mbere, tariki ya 30 Ukuboza 2024.
Perezida Kagame yavuze ko umwaka waranzwe n’ibihe byiza byo kwishimira birimo kuba u Rwanda rwaributse Jenoside yakorewe Abatutsi ku nshuro ya 30 n’ibindi, ndetse agaragaza ko aho bitagenze neza bikwiriye kwigwaho bigakosorwa.
Yagize ati” Uyu mwaka tugiye gusoza, wabayemo ibintu byinshi byiza, ibyiza ni byo mbona. Ibindi bitari byiza, tubishyira iruhande tukagira uko tubigenza bikagaruka ku murongo. Icya mbere, harimo kwibuka amateka, amateka nubwo yaba ari mabi, ari amateka yawe, ari amateka udafitemo uruhare kuba yarabaye mabi, ahubwo harimo kuyakosora, urabyibuka, ukabivanamo isomo, ugakomeza inzira yawe ushaka kwerekezamo.”
Yakomeje ashimira abagize uruhare mu matora y’Umukuru w’Igihugu muri uyu mwaka, ati” Nshaka kongera kubashimira, kandi mwarikoreraga, twarikoreraga, ariko ndabibashimiye rwose.”
Yakomoje ku cyorezo cya Marburg cyabaye muri uyu mwaka, yihanganisha ababuze ababo, ndetse ashimira abaganga ubwitange bagaragaje mu kurengera ubuzima.
Ati” Ndashimira cyane abakora mu rwego rw’ubuzima, abakorerabushake, abitanze rwose. Hari abatanze ubuzima bwabo kugira ngo ubw’abandi bukomeze, abo turabashimira. Bakoresheje wa mutima, wa muco w’ubukotanyi, wa muco w’u Rwanda.”
Umukuru w’Igihugu yabwiye Abanyarwanda ko bagomba kwishimira ibyiza bakorera byagezweho, ati” Kandi igihe cyose kibonetse, tujye twishima pe! Si ko ubuzima bukwiriye kugenda se? Wishimira icyo ugezeho, ugateganyiriza [ahazaza]. Ntabwo imbaraga zose uzisiga aha ngaha.”
Yashoje yibutsa ko kwishima bitavuze kurangara, ati” Nitujya twishima, tujye dusigarana kwa kwirinda, kuri buri muntu, no kuri twese. Ntawe tuzemerera ko yaduhungabanyiriza umutekano, n’umunsi n’umwe.”
