Perezida Paul Kagame yashimiye Donald Trump watorewe kuyobora Leta Zunze Ubumwe za Amerika, avuga ko u Rwanda rwishimiye itsinzi ye kandi rwiteguye gukorana nawe mu nyungu rusange z’ibihugu byombi.
Ni ubutumwa Perezida Kagame yanyujije ku rubuga rwa X, ku mugoroba wo kuri uyu wa 6 Ugushyingo 2024, nyuma y’amatora y’Umukuru w’Igihugu yabaye muri Leta Zunze Ubumwe za Amerika, yegukanywe na Donald Trump.
Perezida Kagame yagize ati” Ubutumwa bwawe busobanutse bwahoze ari uko Leta Zunze Ubumwe za Amerika ikwiye kuba umufatanyabikorwa w’amahitamo, uhamagarira abandi kuyifatiraho urugero aho kubahatira kubona ibintu nkayo no kubaho nkayo. Ndashaka rero gukorana nawe mu nyungu rusange z’ibihugu byombi mu myaka iri imbere.”
Donald Trump wo mu ishyaka ry’Aba-Républicains yatsinze amatora yo kuba Perezida wa 47 wa Leta Zunze Ubumwe za Amerika ku majwi 277, ahigitse Kamala Harris w’ishyaka ry’Aba-Démocrates wagize amajwi 224.
Donald Trump yasezeranyije Amerika ko natorwa azayisubiza icyubahiro yahoranye binyuze mu guhagarika kwivanga mu bibera ahandi, ahubwo imbaraga zigashyirwa mu kwiyubaka.
Mu bindi uyu munya politiki yahize gukora harimo guhagarika intambara y’u Burusiya na Ukraine, ndetse no guteza imbere inganda muri Amerika kugirango zibashe gukora ibintu byinshi kandi biciriritse bigera ku baturage bose.
