Perezida Paul Kagame yakiriye abitabiriye inama y’Inteko Rusanjye y’Ishyirahamwe Mpuzamahanga ry’Umukino wo Gusiganwa mu Modoka (FIA), aboneraho gushimira iri Shyirahamwe ryagiriye icyizere u Rwanda, bakaruha kwakira Inteko Rusanjye ibereye muri Afurika bwa mbere.
Ku mugoroba wo kuri uyu wa Kane muri Kigali Convention Centre, Perezida Kagame yasangiye n’abitabiriye Inteko Rusange ya (FIA), izakurikirwa no gutanga ibihembo ku bahize abandi muri uwo mukino.
Perezida Kagame yashimiye bikomeye FIA n’umuyobozi wayo, Mohammed Ben Sulayem n’ikipe ye, kubwo kugirira icyizere u Rwanda bakaruha kwakira Inteko Rusanjye ibereye ku Mugabane wa Afurika ku nshuro ya mbere.
Ati “ Ndashaka gushimira mbikuye ku ndiba y’umutima wanjye, FIA na Mohammed Ben Sulayem n’ikipe ye kuba baregeranyije ibi byose hamwe, no kugirira icyizere u Rwanda rukabasha kubakira.”
Umukuru w’Igihugu yavuze ko kuba iyi nama ibereye mu Rwanda, bizarushaho kumenyekanisha umukino w’amasiganwa muri Afurika yose, ndetse avuga ko n’ubwo Afurika idakunze guhabwa amahirwe yo kwakira ibikorwa bikomeye, ariko ari umugabane ufite impano ndetse ko hari igihe amahanga azabiyungaho.
Yashoje ijambo rye yongera gushimira ndetse yizeza abageze mu Rwanda ko bazasubira mu bihugu byabo bamenye byinshi ku Rwanda. Ati” Mwarakoze cyane kuduha uyu mwanya, mwakoze kubana natwe hano. Nzi neza ko ubwo muzaba mwitegura gusubira iwanyu, muzaba mwabonye ibihagije bidakunze kuvugwa neza mu itangazamakuru, kuri internet n’ahandi.”
Umuyobozi wa FIA, Mohammed Ben Sulayem, yashimiye u Rwanda na Perezida Kagame kubwo icyizere bagiriye FIA, ahamya ko bakoranye bya hafi mu gutegura iyi nama, ndetse ashimangira ko ari ubwa mbere bakiriwe n’Umukuru w’Igihugu mu bihugu bitandukanye bakoreyemo.
Uyu musangiro witabiriwe n’abayobozi mu nzego zitandukanye barimo Claire Akamanzi uyobora NBA Africa, Amadou Gallo Fall uyobora Irushanwa rya Basketball Africa League n’abandi, n’ibyamamare nk’umunyarwenya Steve Harvey n’abandi, basusurutswa n’umuhanzi Alyn Sano.
Muri iki gikorwa hashimiwe Abanyabugeni batatu b’Abanyarwanda bahize abandi gukora ibihangano bibereye ijisho bijyanye n’isabukuru y’imyaka 120 ishize FIA ibayeho.
