Perezida Paul Kagame yashimiye John Mahama uherutse gutorerwa kuyobora Ghana, ashimangira ko u Rwanda na Ghana ari ibihugu bisangiye ubushake bw’iterambere.
John Mahama w’ishyaka National Democratic Congress (NDC), yongeye gutorerwa kuyobora Ghana, ku majwi 57,4%, atsinze Mahamudu Bawumia.
Kuri uyu wa kabiri, Perezida Kagame yashimiye Perezida Mahama wongeye gutorerwa kuyobora Ghana, ashimangira ko ibihugu byombi bisangiye ubushake bw’iterambere.
Ati” U Rwanda na Ghana bisangiye ubushake bw’iterambere kandi twiteguye gukomeza imikoranire mu kwagura umubano mwiza n’icyerekezo cy’iterambere rya Afurika.”
John Mahama yabaye Perezida wa Ghana kuva mu 2012 kugeza mu 2017, kuri ubu akaba asimbuye ku butegetsi Nana Akufo-Addo w’ishyaka New Patriotic Party (NPP) wabugiyeho mu 2017.
U Rwanda na Ghana bisanzwe bifitanye imikoranire mu ngeri zitandukanye zirimo guteza imbere uburezi n’ibijyanye n’ubukerarugendo.
