Kuri uyu wa kabiri, tariki ya 3 Ukuboza 2024, Perezida Paul Kagame yashyize mu myanya Perezida w’Urukiko rw’Ikirenga, Madamu Domitilla Mukantaganzwa, na Visi Perezida warwo, Bwana Alphonse Hitiyaremye.
Aba bayobozi, Perezida Kagame yabashyize mu myanya hagendewe ku biteganywa n’Itegeko Nshinga rya Repubulika y’u Rwanda, ingingo yaryo ya 154.
Mukantaganzwa Domitilla asimbuye ku mwanya wa Perezida w’Urukiko rw’Ikirenga, Nteziryayo Faustin, mu gihe Hitiyaremye Alphonse asimbuye ku mwanya wa Visi Perezida, Marie Thérèse Mukamulisa.
Mukantaganzwa Domitilla wamenyekanye cyane ubwo yayoboraga urwego rw’Igihugu rushinzwe Gacaca, yari asanzwe ari Perezida wa Komisiyo y’u Rwanda ishinzwe ivugururwa ry’amategeko kuva mu 2019.
Ku rundi ruhande, Hitiyaremye Alphonse wagizwe Visi Perezida, yakoze imirimo itandukanye irimo kuba ushinzwe imanza za Leta, Umunyamabanga Wihariye wa Minisitiri n’Umuyobozi ushinzwe Ishami ry’Uburenganzira bwa Muntu muri Minisiteri y’Ubutabera.
Yabaye kandi Umushinjacyaha wa Repubulika, Umugenzuzi Mukuru w’Ubushinjacyaha n’Umushinjacyaha Mukuru Wungirije. Kuva mu Kwakira 2013 ni umucamanza mu Rukiko rw’Ikirenga.
