Perezida Kagame yagaragaje impamvu ituma hakunze kugaragara impinduka muri Guverinoma, ahamya ko bikorwa mu nyungu z’umuturage kugira ngo abone ibyo akwiriye.
Ni bimwe mu byo yagarutseho kuri uyu wa Kane, mu kiganiro yagiranye n’itangazamakuru, ubwo yari abajijwe impamvu hari abayobozi bakurwa ku nshingano hadaciye kabiri bashyizweho.
Perezida Kagame yavuze ko izi mpinduka zikorwa bigendanye n’imiterere y’Igihugu n’aho cyifuza kugera.
Ati “Ndabivuga mpereye ko bihera ku bintu byinshi, kandi n’imiterere y’igihe, imiterere y’igihugu, imiterere y’abantu, n’icyifuzo cy’ubuyobozi bw’igihugu buba bwifuza ko twakora ibintu neza, nta guta igihe, bishoboye no kugabanya icyo bidutwara, icyo bidusaba, byose bigakubira hamwe.”
Perezida Kagame yasobanuye ko impinduka zabaye muri Guverinoma haba mbere y’amatora na nyuma yayo, zari zigamije gushakisha uburyo igihugu cyakora ibintu byinshi kandi ku muvuduko ukwiriye.
Yakomeje agaragaza ko ku bijyanye n’imikorere y’igihugu hashyirwa imbere inyungu z’abaturage b’u Rwanda no kureba niba ibyo bakwiriye kubona babibona mu buryo bukwiriye.
Ati “Icya mbere nshyira imbere ni abaturage b’u Rwanda. Barabona ibishoboka byose bikwiye? Uko dushoboye? Hari ibyo tutageraho, hari ibyo tutabona kubera ko tutanabishoboye, tukanategereza igihe amikoro azabonekera wenda tukabikora. Ariko ku bihari, ku bishoboka barabona ibyiza bikwiye uko bishoboka cyangwa Oya?”
Perezida Kagame yasobanuye ko nyuma yo gushyira abayobozi mu nshingano harebwa niba bari kuzikora neza uko bikwiye, cyangwa se niba bashobora kuba bashyirwa ahandi bakabikora neza kurushaho.
Yagaragaje kandi ko hari ubwo umuyobozi ashyirwa mu nshingano, ariko nyuma bikagaragara ko habayeho kumwibeshyaho, atatanze umusaruro yari yitezweho, bityo agahindurwa hakageragezwa n’undi.
