Perezida Paul Kagame yibukije abayobozi ko gushimira ibyo bahawe bigendana no gukora, ndetse agaragaza ko hari ibyo agomba Abanyarwanda nyuma y’ibyavuye mu matora y’Umukuru w’Igihugu ya 2024.
Ni ingingo Perezida Kagame yagarutseho mu gitondo cyo kuri iki Cyumweru, tariki ya 19 Mutarama 2025, mu masengesho yo gushimira no gusabira igihugu ‘National Prayer Breakfast’ yabereye muri Kigali Serena Hotel.
Perezida Kagame yabwiye abayobozi n’abandi banyacyubahiro bitabiriye aya masengesho ko gushimira ibyo bahawe bigendana no kumenya gutanga by’umwihariko ku wa guhaye.
Ati “Gushimira bivuze ngo warahawe, urashimira ibyo wahawe, ariko wowe utanga ryari? Urahabwa gusa bikarangirira aho? Nawe ugomba kugira icyo utanga, na ho haba hari ikibazo! Uhawe ugashimira, ugahora ushimira ibyo uhawe, ariko wowe ntugire icyo utanga, ubwo niho abantu bakwiriye kuba bisuzuma.”
Perezida Kagame yakomeje agaragaza ko hari abayobozi benshi bahabwa inshingano ariko ntibashobore gukora ngo batange umusaruro baba bitezweho.
Ati “Umuntu ku ruhande rumwe ugashimira kuko wabonye, ufite ibyo wakiriye, ku rundi ntihagire ikikuvamo ngo kigere ku bandi.”
Perezida Kagame yabwiye abayobozi ko bakwiriye guhuza ubushobozi n’ubumenyi bafite n’ibyo bakwiriye gukorera Abanyarwanda.
Ati “Izindi nshingano abantu bamwe bafite ni urugamba, ni nko guhora ku rugamba, uringaniza ibyo tuzi dukwiriye kuba dukora, bwa bumenyi bubiduha, n’ibikorwa dukwiriye kuba dukora, kandi byo ntushobora kubihisha, ntushobora kubeshya abantu.”
Perezida Kagame yavuze ko ashimira ibyavuye mu matora y’Umukuru w’Igihugu yabaye mu 2024, ndetse agaragaza ko kuba Abanyarwanda baramugiriye icyizere na we hari ibyo abagomba.
Ati “Bavuze amatora twanyuzemo na yo mbashimira. Ariko ubwo tubishimira njye nzi ko mfite umwenda, nashimiye ibyo nahawe ngomba kugira ibyo ntanga, ntabwo nahabwa gusa, ngo nishime, ariko abantu bategereze ku kizamvamo kijyanye nicyo nahawe ngo kibure.”
Perezida Kagame yongeye kugaruka ku bayobozi bahabwa inshingano muri Leta ariko ntibashyire mu bikorwa ibyo bagomba gukora cyangwa bagakora ibinyuranye nabyo.
Ati “Turicara no mu nama, tugafata ingamba z’ibizakorwa, ibizabikora bizava he, abazabikora ni bande? Tukabyumvikana ndetse tukongera tukicara ibintu byose tukabishyira ku murongo […] tukavuga ngo tuvuye aha tugiye gushyira ibintu mu bikorwa.”
“Hatinda gato wabaza umuntu umwe uti ‘tugeze he, ni wowe warushinzwe ibikorwa’, agatangira gusaba imbabazi ati ‘Naribagiwe’, ukabaza undi akakubwira ati ‘Yego twarabikoze’ wajya gusanga ugasanga ibyo yakoze ni ibindi bitandukanye nibyo mwumvikanye.”
Umukuru w’igihugu yongeyeho ko iyo mu bayobozi habayemo kutuzuza inshingano, bagasaba imbabazi, iyo bikomeje gutyo bihinduka “Ikosa ryahindutse icyaha.”
Yagaragaje ko hari n’abandi bitwaza amasengesho bagamije guhunga inshingano, baba basa n’abasaba Imana ibyo yabahaye ariko ntibabikoreshe.
