Perezida Paul Kagame yifurije Abasilamu bose umunsi mwiza wo gusoza igisibo gitagatifu cya Ramadhan, abasaba kurangwa n’indagagaciro z’igendana n’uyu munsi mukuru.
Mu butumwa bwanyujijwe ku rubuga rwa X, rw’ibiro by’Umukuru w’Igihigu, kuri iki Cyumweru, tariki ya 30 Werurwe 2025, ubwo hizihizwaga umunsi mukuru wa Eid Al-Fitr.
Bugira buti” Eid Mubarak ku Bayisilamu bose bo mu Rwanda ndetse no ku Isi yose bizihiza Eid al-Fitr.”
Yakomeje abifuriza kugira amahoro no kurangwa n’indagagaciro zigendana n’ukwemera kwa Isilamu.
Ati” Iki gihe cy’ibyishimo kibazanire mwe n’abanyu amahoro, umunezero n’iterambere. Reka dukomeze gushyigikira indangagaciro zo kurangwa n’impuhwe, ubumwe, n’ubuntu bisobanura uyu munsi wizihizwa.”
Isengesho rya Islam ku rwego rw’Igihugu ryabereye kuri Kigali Pelé Stadium i Nyamirambo, riyobowe na Mufti w’u Rwanda Sheikh Sindayigaya Mussa.
Ryitabiriwe n’Abasilamu ibihumbi batuye mu mujyi wa Kigali barimo n’Umugaba Mukuru w’Ingabo z’u Rwanda, General Mubarak Muganga.
Sheikh Sindayigaya yibukije ko habura iminsi mike ngo Abanyarwanda batangire ibikorwa byo Kwibuka ku nshuro ya 31, asaba Abayisilamu kugira uruhare muri ibi bikorwa no gufasha abarokotse Jenoside yakorewe Abatutsi.
