Perezida Kagame yafashe mu mugongo mugenzi we wa Turukiya, Recep Tayyip Erdoğan, n’abanyagihugu nyuma y’inkongi yibasiye hoteli iri mu mujyi wa Bolu, abagera kuri 76 bakahasiga ubuzima.
Ni ubutumwa Perezida Kagame yasangije ku rubuga rwa X, mu gitondo cyo kuri uyu wa gatatu, tariki ya 22 Mutarama 2025.
Ubutumwa bugira buti” Ndihanganisha Perezida Recep Tayyip Erdoğan n’abaturage ba Turikiya, kubera ubuzima bwatakariye mu nkongi y’umuriro yibasiye hoteli muri Bolu. Twifatanyije n’imiryango yagize ibyago n’abagizweho n’iki cyago, Turifuriza abakomeretse gukira vuba.”
Mu rukerera rwo ku wa kabiri, tariki ya 21 Mutarama, nibwo inkongi y’umuriro yibasiye hoteli ya Grand Kartal iri mu ntara ya Bolu, mu majyaruguru ya Turukiya.
Minisiteri y’Ubuzima muri Turukiya yatangaje ko abagera kuri 76 bahasize ubuzima barimo abagerageje guhunga baciye ku migozi ku madirishya, mu gihe abandi barenga 50 bakomeretse mu buryo bukabije bahise bajyanwa kwa muganga.
Minisitiri w’Umutekano muri Turikiya, Ali Yerlikaya, yatangaje ko muri iyi Hoteli harimo abantu 238 banditse, biganjemo abari bahatembereye kuko bari mu bihe bisatari ibiruhuko by’abanyeshuri by’ibyumweru bibiri.
