Perezida w’u Rwanda Paul Kagame yihanganishije abanya-Guinée muri rusanjye, nyuma y’urupfu rw’abantu 56 baguye mu mvururu zabereye muri Stade yo mu gace ka N’Zérékoré, ubwo hari hamaze kubera umukino.
Izi mvururu zabaye nyuma y’umukino wabaye ku Cyumweru, tariki ya 1 Ukuboza 2024, wahuje ikipe ya N’zérékoré FC n’iya Labé FC, mu majyepfo y’iki gihugu.
Ku munsi wo ku wa kabiri, Perezida Kagame yanyujije ubutumwa ku rubuga rwa X, yihanganisha Perezida wa Guinée, General Mamadi Doumbouya n’abaturage muri rusanjye ku bw’ubuzima bw’abaturage bwaburiye muri iyi sanganya.
Ati” Nihanganishije cyane umuvandimwe wanjye, Perezida General Mamadi Doumbouya n’abaturage ba Guinée ku bw’ubuzima bw’abantu bwaburiye mu isanganya ryabereye kuri stade muri N’Zérékoré. Twifatanyije n’imiryango y’ababuze ababo n’abaturage ba Guinée muri rusange”.
Imvururu zabereye muri uyu mukino zaturutse ku bafana b’ikipe ya Labé FC batishimiye imyanzuro y’umusifuzi, bavuga ko ikipe yabo yariri kwibwa bitewe nuko yahawe amakarita abiri atukura ndetse umusifuzi atanga penaliti ku ikipe ya N’zérékoré FC, ku musozo w’umukino.
Guhera kuri iyo penaliti abafana ba Labé batangiye gutera amabuye bagenzi babo, babisanzamo bamwe barahunga, ari nako polisi itera imyuka iryana mu maso mu guhosha imvururu, birangira 56 bahasize ubuzima, abandi 100 bakomereka bikabije.
Perezida Doumbouya yihanganishije ababuze ababo muri izi mvururu, yifuriza abakomeretse gukira vuba ndetse abizeza ubufasha.
U Rwanda na Guinea n’ibihugu bisanganywe umubano mwiza n’ubufatanye mu bice bitandukanye, bigamije kugera ku iterambere ry’abaturage.
