Ishyirahamwe ry’Umupira w’Amaguru mu Rwanda, Ferwafa,ryageneye agahimbazamusyi ikipe ya Rayon Sports WFC, nyuma yo kugera ku mukino wa nyuma wa Cecafa iri kubera muri Kenya.
Rayon Sports WFC ihagarariye u Rwanda mu marushanwa ya Caf Women’s Champions League Cecafa Qualifiers 2025, yageze ku mukino wa nyuma isezereye Kampala Queens yo muri Uganda kuri penaliti 4-3 nyuma yo kunganya 0-0 mu minota 120.
Mu rwego rwo kubatera imbaraga no kuberaka ko babashyigikiye, Ferwafa yahise igenera iyi kipe agahimbazamusyi kangana na 5,000,000 Frw.
Bijejwe ko mu gihe baba bashije kwegukana igikombe bagakatisha itike ya Caf Women’s Champions League, iri shyirahamwe ryazabaha andi mafaranga yisumbuyeho.
Uretse kandi ka gahimbazamusyi iyi kipe yagenewe, n’abandi bakunzi ba Rayon Sports bakomeje kuyishimira ko yahesheje ishema Igihugu, ari na ko bayigenera ishimwe ry’amafaranga.
Minisitiri wa Siporo,Nelly Mukazayire, nawe yashimiye iyi kipe maze ayisaba kwegukana igikombe.
Ati ” Mukomereze aho bakobwa bacu.Murashoboye kandi tubari inyuma .Icyo gikombe mugitahane maze u Rwanda Rweme.”
Rayon Sports izahura na JKT Queens yo muri Tanzania, yasezereye Kenya Police Bullets kuri penaliti 4-2. Ni umukino uteganyijwe ku wa Kabiri, tariki ya 16 Nzeri 2025
Biteganyijwe ko umukino wa nyuma uzaba ku wa Kabiri, tariki ya 16 Nzeri 2025.
Ikipe izegukana igikombe hagati ya Murer ana JKT Queens, ni yo izahita ikatisha itike yo kuzakina amarushanwa ya Caf Women’s Champions League, ihagarariye Akarere ka Cecafa.
