Umuyobozi Mukuru w’Urwego rw’Igihugu rushinzwe Iterambere, Jean-Guy Afrika, n’Umuyobozi ushinzwe Ubukerarugendo muri RDB, Irène Murerwa, bahuye na Sonia Rolland, baganira ku mikoranire yagira u Rwanda igicumbi cy’ubukerarugendo na sinema.
Mu butumwa RDB yashyize ku rubuga rwayo rwa X, yatangaje ko ibi biganiro byabaye ku wa Mbere, tariki ya 20 Mutarama 2025.
Umunyarwandakazi Sonia Rolland wabaye Nyampinga w’u Bufaransa mu 2000, yasobanuye ko ari gukora filime mbarankuru igamije kugaragaza ibyiza nyaburanga bitatse u Rwanda.
Iyi filime izaba igaragaza ahantu hakurura ba mukerarugendo ndetse izagira uruhare mu kuzamura sinema mu gihugu.
Sonia Rolland wakuriye mu Bufaransa agahabwa ubwenegihugu, avuga ko ari umushinga yateguye kandi yishimira, ndetse kumenyekanisha ibyiza bitatse urw’Imisozi igihumbi ku rwego mpuzamahanga abifata nk’ikintu cy’ingenzi.
Umuyobozi wa RDB, Jean-Guy Afrika, avuga ko gukorana n’abantu bafite izina rizwi ku rwego mpuzamahanga nka Sonia Rolland bizatuma igihugu kirushaho gukundwa no kumenyekana mu nzego zirimo ubukerarugendo na sinema.
Irène Murerwa ushinzwe Ubukerarugendo muri RDB yashimangiye ko iyi mikoranire izagira uruhare mu kurushaho guteza imbere ubukerarugendo na sinema mu Rwanda, bityo bizanira amahirwe mashya Abanyarwanda by’umwihariko abakora muri izo ngeri.
Filime mbarankuru ya Sonia Rolland, izaba igaragaza ahantu nyaburanga hatandukanye hari mu Rwanda, byitezwe ko izagira uruhare rugaragara mu kuzamura umubare wa ba mukerarugendo basura ndetse bashora imari mu Rwanda.
