Urwego rw’Igihugu rw’Iterambere, RDB, rwatangaje ko abana b’ingagi 22 bagiye guhabwa amazina mu muhango wo Kwita Izina utegerejwe ku itariki ya 18 Ukwakira 2024.
Uyu muhango usanzwe ubera mu Ntara y’Amajyaruguru ugiye kuba ku nshuro ya 20, aho uzitabirwa n’abashyitsi barenga ibihumbi bibiri bazaba bari kumwe n’abaturage b’Akarere ka Musanze n’inkengero zako.
Mu nshuro 20 uyu muhango umaze kuba, abana b’ingagi 395 bamaze guhabwa amazina, mu gikorwa cyishimirwa ku rwego mpuzamahanga kuko kinagaragaza uruhare rw’u Rwanda mu kurengera ibidukikije muri rusange.
Mu kiganiro n’itangazamakuru Guverineri w’Intara yAmajyaruguru, Mugabowagahunde Maurice yavuze ko ibikorwa by’ubukerarugendo bikorwa muri Pariki y’Ibirunga biteza imbere abahaturiye mu turere twa Musanze na Rubavu.
Akomeza avuga ko ibibazo by’umutekano muke biri mu gihugu cya Repubulika Iharanira Demokarasi ya Congo nta ngaruka bigira kuri ubu bukerarugendo, cyane ko aka karere kahaturiye.
Ati “Amajyaruguru umutekano ni 100%, abazaza bazaze bazi ko mu Majyaruguru umutekano urinzwe. Intambara zibera hakurya y’umupaka nta ngaruka mbi zagize kuko umubare uriyongera. Abaturage bose bizeye ko imipaka y’igihugu irinzwe, pariki yacu urarinzwe.”
Yamaze impungenge abafite ikibazo ku bijyanye n’imvura ishobora kubangamira uyu muhango, avuga ko biri gutegurwa k’uburyo n’abazaza ikibazo cy’imvura bazabona uko bayikinga igikorwa kikagenda neza.
Umuyobozi w’Ishami ry’Ubukerarugendo mu Rwego rw’Igihugu rw’Iterambere, RDB, Rugwizangoga Michaella, yavuze ko bishimira umusaruro bamaze kugeraho mu bijyanye no gutegura umuhango wo kwita Izina bigendanye niterambere igihugu kimaze kugeraho mu rwego rwubukerarugendo
Mu myaka 15 ishize, umusaruro u Rwanda rwakuraga mu bikorwa by’ubukerarugendo wari miliyoni 180$ gusa, icyakora ubu ziri kuzamuka, akaba yarageze kuri miliyoni 620$ mu mwaka ushize, ndetse intego ikaba kuwugeza kuri miliyari 1,1$ muri Gahunda y’Igihugu yo kwihutisha Iterambere, icyiciro cya kabiri (NST2).
