Amasangano y’umuhanda [rond-point] ari imbere y’inyubako ya Kigali Convention Centre, KCC, ari kurimbishwa bushya nyuma y’uko ayari asanzweho amaze igihe asenywe.
Mu mpera z’umwaka ushize ni bwo rond-point iri hagati y’inyubako ya KABC, Kigali Heights na KCC yakuweho. Muri iyi rond-point hahoze ikibumbano cy’umubyeyi n’umwana, bamwe bitaga ku “Mugore ucira amazi” kuva hambere.
Iyi rond-point iri kongererwa ubwiza hagamijwe kuyirimbisha bijyanye n’icyerekezo cy’Umujyi wa Kigali wo kuba ahantu hagendwa kandi hakurura ba mukerarugendo.
Rond-point y’imbere ya KCC ifite umwihariko kuko yafatwaga nk’ahantu ho kuruhukira, kuhaganirira, kuhakinira imikino itandukanye irimo “Road Tennis’’, kuhafatira amafoto ndetse hari hamaze igihe hasorezwa siporo rusange iba kabiri mu kwezi.
Kuri ubu ugeze ahari iyi rond-point, imirimo irarimbanyije ndetse abakozi bari guhihibikana bayitunganya ku buryo izaba ibereye ijisho.
Iyi mirimo iri gukorwa na Sosiyete izobereye mu bijyanye n’Ubwubatsi ya Real Contractors.
Abaturiye n’abakorera hafi y’iri rond-point bavuga ko haba hari gutunganywa kugira ngo hazajye hifashishwa mu mikino y’amasiganwa y’imodoka, cyane ko ari ahantu hagutse ndetse hakikijwe n’ibikorwa nyaburanga byatuma iki gikorwa kihashyizwe cyarushaho gukurura ba mukerarugendo.
Mu bihe bitandukanye, kuri iyi rond-point hajya hakinirwa imikino yo gusiganwa ku modoka by’umwihariko mu gutangiza Rwanda Mountain Gorilla Rally.
Rond-point ya KCC yafunzwe mu 2016, ubwo umuhanda unyura haruguru y’iyi nyubako wafungwaga ugaharirwa abanyamaguru gusa.
Ahari iyi rond-point ni ho hazatangirira, hanasorezwe Agace ka nyuma ka Tour du Rwanda ya 2025, iteganyijwe kuva tariki ya 23 Gashyantare kugeza ku wa 2 Werurwe 2025.
Aka Gace ka Munani kazakinwa ku Cyumweru, tariki ya 2 Werurwe 2025, aho abasiganwa bazahagurukira kuri KCC, bakazenguruka ibice bitandukanye mbere yo kongera kuhasoreza nyuma yo kugenda ibilometero 73.
Amakuru yizewe kandi agaragaza ko rond-point ya KCC iri kuvugururwa bigendanye n’imyiteguro ya Shampiyona y’Isi y’Amagare izabera i Kigali kuva tariki ya 21 kugeza ku ya 28 Nzeri 2025, kuko ari ho izasorezwa.
